دعمًا للخطيب.. الدماطي يوجه رسالة لجماهير الأهلي ويؤكد: سنعود سريعًا

حرص محمد الدماطي، عضو مجلس إدارة النادي الأهلي، على توجيه رسالة مطولة لجماهير القلعة الحمراء، أكد خلالها دعمه الكامل للكابتن محمود الخطيب، مشددًا على تقديره لما قدمه للنادي، وثقته في قدرة النادي على تجاوز المرحلة الحالية والعودة سريعًا إلى طريق الانتصارات.

وجاءت رسالة الدماطي في ظل حالة الجدل حول نتائج الفريق، حيث دعا الجماهير إلى التكاتف وتقديم الدعم الإيجابي، مؤكدًا أن الضغوط المستمرة قد تؤدي إلى بعض الأخطاء، لكنها تظل جزءًا من طبيعة العمل داخل منظومة بحجم الأهلي.

وكتب الدماطي عبر حسابه الرسمي على موقع التواصل الاجتماعي “فيس بوك”: "بقالي حوالي شهر و نص قافل الفيسبوك و كل السوشال ميديا تماما، وامبارح بس فتحت ونزلت صورتي مع الكابتن الخطيب كنوع من الدعم الأدبي لراجل عمل كتير للنادي وبيفضل النادي على نفسه، وله فضل عليا بعد ربنا إني أكون موجود وأمثل كيان الأهلي العظيم".

وأضاف: "فرصة بما إن في حالة هدوء حتى لو مؤقت أقول كلمتين لعل وعسى يحصل نوع من التوضيح، وكالعادة أنا بتكلم من قلبي وبما يرضي الله ومش بزعل من أي نقد أو تجريح لأني عارف إن دي ضريبة المكان اللي أنا فيه، ولأني متأكد إن النادي الأهلي هو مصدر السعادة يمكن الوحيدة لـ 80 مليون بني آدم، فطبيعي يحصل زعل، زي لما في أي نجاح بيحصل إشادة، ودايما بقول مش بعرف مهما حاولت أستخبى وقت التراجع طالما بظهر وقت النجاح".

وقال: "مفيش حد أبدا سعيد بالنتائج وده كان واضح جدا في بيان النادي إن في عملية إصلاحات كبيرة هتتنفذ الفترة الجاية، وطبيعي في أي منظومة في العالم، نادي أو شركة أو أي مكان، في ضغوطات مستمرة ممكن يحصل بسببها أخطاء، الإنسان بطبيعته طول ما هو مضغوط ممكن يغلط، والشطارة إن الأخطاء تبقى قليلة ويتم تداركها سريعا، واعتقد إن حجم البطولات والإنجازات في الـ 8 سنوات أكبر بكتير من حجم الإخفاقات، ولكن ده حالنا كنادي أهلي مش بنقبل الإخفاق وده سبب النجاح المستمر، لكن ممكن يبقى سبب أحيانا في أخطاء".

وتابع: "الضغط المستمر اللي بيولد أخطاء مش بس على الإدارة، ممكن كمان يكون على المدربين واللاعبين، ممكن الاختيار فنيا يكون سليم لكن قدرة المدرب أو اللاعب على استيعاب حجم المتطلبات والضغوطات تبقى ضعيفة، وده بيحصل وطبيعي، وشوفناه مع لاعبين كتير سواء لم ينجحوا أو قدرتهم على العطاء في أعلى مستوى مكنتش فيها استمرارية طويلة، وممكن يخسرنا مدربين ولاعبين ممتازين بسبب حرصنا المستمر على عدم الإخفاق أو إعطاء فرص".

واستطرد: "النادي الأهلي بيستمد قوته من جمهوره، محتاجين الجمهور يبقى كله على قلب راجل واحد، وهنا مش قصدي الإدارة، قصدي النادي، مش عايزين خناقات وتنمر على لاعيبة، مش عايزين خناقات فنية على لاعبين عشان انتصار لوجهة نظر أو حب وكره، اللي بيلعب راجل إحنا كلنا في ضهره".

وأردف الدماطي: "عايزين نبص على الكورة ككورة وكلنا نبقى وحدة واحدة، عندنا مشكلة في المدرج واتكلمت عليها وكمية الرسايل والشتيمة اللي جتلي مش طبيعية، بس أكدتلي حاجة واحدة إن ده ملف مهم جدا وحساس جدا، ووالله ما حد مقصر، في بس رواسب ومشاكل محتاجة وقت وثقة من الجميع، مش مهم مين يبقى موجود، مش مهم المسمى، كلنا جمهور الأهلي، من أيام ما كانت التالتة دي هي التانية دلوقتي، من أيام عم حسين ربنا يرحمه، لا كنا بنقول مين بيقودنا، ولا كان في دماغنا حاجة غير التشجيع".

وأوضح: "الأهلي كبير وكبير أوي، وطالما اخترنا كلنا إن طموحنا يبقى ملوش حدود يبقى لازم نفهم إن ممكن ده يسبب أخطاء، وتاني مش بتكلم عن إدارة بس، بتكلم على لاعيبة ومدربين، وعلى الجمهور كمان، لأن طموحنا الكبير خلانا مش بنعرف نفرح عشان دايما باصين لفوق أكتر. أنا في الآخر جمهور وطالع من المدرج، وربنا يعلم أنا بحب الأهلي قد إيه، وشايف إن كلنا لازم على قد ما نضغط، يبقى دايما ضغطنا إيجابي ويبقى دايما عامل نجاح".

وزاد عضو مجلس الأهلي: "هنرجع؟ أكيد هنرجع إن شاء الله، النادي الأهلي منظومة مش بتعرف الفشل، حصل تراجع؟ أكيد حصل وبيحصل، والتاريخ بيقول كده، وبالعكس على قد ما ضغط الجمهور صعب، بس لما الضغط زاد في السنين الأخيرة، العودة بتبقى أسرع وبكتير، شوفنا زمان فترات تراجع أطول وأصعب لما الضغط كان أقل، اسم الأهلي زي الجبل ما يهزه ريح طول ما الكل حاطط اسم الأهلي قدامه".

واختتم الدماطي رسالته بالتأكيد على أن وحدة الجماهير ودعمها الإيجابي تمثل الركيزة الأساسية لعودة الفريق، مشددًا على أن الأهلي قادر دائمًا على تجاوز أي تراجع بفضل تماسك منظومته.