أحمد محارب: «برشامة» يناقش الغش المجتمعي بشكل كوميدي ذكي.. وهذا سر موافقتي للمشاركة في العمل|حوار
كشف الفنان أحمد محارب كواليس مشاركته في فيلم برشامة، متحدثًا عن تفاصيل دوره، وأسباب تحمسه للعمل، وعلاقته بفريق الفيلم، إلى جانب المعايير التي يعتمد عليها في اختيار أدواره الفنية، وخططه المقبلة في الدراما والسينما.
وأوضح «محارب» في حوار خاص لـ «مصر تايمز» سبب استمرارية تعاونه مع الفنان هشام ماجد والفنان مصطفى غريب في أكثر من عمل، وإلى نص الحوار:
في البداية.. حدثنا عن دورك في فيلم برشامة؟
بقدم دور سيد، وهو مدير أعمال فاتن (ريهام عبدالغفور)، وهي بتشتغل رقاصة وعندهم فرقة، الشخصية ليها دور مهم في الأحداث وبتتحرك وسط أجواء كوميدية مرتبطة بالقصة.
كيف تم ترشيحك للمشاركة في الفيلم؟
تم ترشيحي من خلال المخرج خالد دياب، وده بسبب تعاون سابق بينا في مسلسل أشغال شقة الجزء الأول، وكنت بطل آخر حلقتين فيه، كانت تجربة مهمة، ومن بعدها حصل بينا تفاهم وثقة كبيرة.
ما الذي جذبك للمشاركة في فيلم برشامة؟
أول حاجة ثقتي في خالد دياب، وكمان هشام ماجد اللي اشتغلت معاه قبل كده في أكتر من عمل زي قلب أمه وأشغال شقة، وكمان مسرحية في موسم الرياض.
غير كده، الكاست كله قريب مني وعلى علاقة صداقة بيهم زي ريهام عبدالغفور، باسم سمرة، حاتم صلاح، ومصطفى غريب، فحسيت إن العمل ده مختلف ومميز، وكمان لما قريت السيناريو اتحمست جدًا للفكرة.
ما القضية التي يناقشها الفيلم؟
الفيلم مش بس بيتكلم عن امتحانات المنازل للكبار في إطار كوميدي، لكنه كمان بيناقش فكرة الغش والتناقضات الموجودة في المجتمع، الموضوع متقدم بشكل ذكي جدًا وبكتابة واعية من المؤلفين، وده كان من أهم أسباب حماسي للعمل.
كيف كانت كواليس العمل مع الفنانين؟
الكواليس كانت جميلة جدًا، هشام ماجد من أهدى وألطف الفنانين، ومتعاون جدًا وبيحب الشغل الجماعي، وده بيسهل كل حاجة.
مصطفى غريب صديقي من زمان وكواليسه دايمًا خفيفة الدم، بصراحة كل فريق العمل كان فيه طاقة حلوة، رغم إن في أوقات كانت شاقة، لكن الروح الحلوة بينا كانت بتخفف أي ضغط.
على أي أساس تختار أدوارك الفنية؟
في كذا معيار، أهمهم إن العمل يعجبني ككل، والدور يكون مؤثر ويضيف لي في مشواري، كمان جودة السيناريو والقضية اللي بيقدمها، والمخرج، وفريق العمل، وشركة الإنتاج.. كل دي عوامل بتفرق معايا جدًا.
ما أبرز أعمالك المقبلة؟
موجود في الجزء الخامس من مسلسل اللعبة، ودي أول مرة أشارك فيه، والدور كبير وموجود في أغلب الحلقات، وكمان في تحضيرات لأعمال تانية خلال الفترة الجاية، لكن ده الأقرب حاليًا.
