إبراهيم الأسيوطي يروي تفاصيل حياته قبل الأهلي

أطلق إبراهيم الأسيوطي ناشئ النادي الأهلي الواعد عبر “إذاعة أون سبورت إف إم” أمس عدة تفاصيل عن حياته قبل الأهلي، والذي نالت تفاعل كبير من جمهور النادي الأهلي عبر مواقع التواصل الإجتماعي، روى الأسيوطي نبذة عن طبيعة مصدر رزقه في صغره، والعديد من كواليس معاناته ماديًا أثناء ممارسته كرة القدم.

تفاصيل حياته قبل الأهلي

 خلال حديثه قال الأسيوطي: «ماكنتش أحلم أروح النادي الأهلي ولما مضيت قعدت 3 أيام منمتش، قبل انضمامي للنادي الأهلى كنت بشتغل في قهوة ويوميتي 30 جنيه وفي يوم قالولي أغير الأنبوبة وأخدتها وروحت لعبت في الأكاديمية وحطيت الأنبوبة جنب العارضة والناس قعدت في القهوة مشربتش المشاريب وضربوني علقة محترمة».

معاناته المادية

وعن معاناته المادية كشف الأسيوطي: « لما كنت بلعب في أسمنت أسيوط الجزمة اللي كنت بلعب بيها كانت مقطوعة والكابتن نبيل محمود لما شافها خلى النادي جابلي جزمتين جداد، كنت بحب ألعب حافي ماكنتش بعرف العب بالجزمة». وأضاف: «تريزيجيه إداني جزمته لما طلعت فريق أول ومحتفظ بيها في الدولاب لحد دلوقتي».

كواليس إصابته بالصليبي

سرد الأسيوطي تفاصيل إصابته بالصليبي قائلًا: «قبل إصابتي بالصليبي كان عندي إحساس غريب إني هتصاب، ولحظة الإصابة كان التحام عادي بيني وبين لاعب إنبي حسيت بطرقعة فضلت دقيقتين تلاتة بصرخ من الألم وده كان أصعب إحساس حسيته من ساعة ما لعبت كورة، والإصابة دي كانت كابوس بالنسبالي من وأنا صغير بس الحمد لله ربنا مبيجبش حاجة وحشة وأنا راضي باللي ربنا كتبهولي وربنا هيعوضني بإذن الله».