ناقد فني: أحمد سعد نجح في تقديم اللون الدرامي بأغنية "أنا مش فاهمني"|خاص

تحدث الناقد الفني، أشرف عبدالرحمن، عن أغنية "أنا مش فاهمني" للفنان أحمد سعد، مؤكدًا أنها من الأغاني المؤثرة ضمن ألبومه الجديد اللي طابعه الحزن. 

 أحمد سعد نجح في تقديم اللون الدرامي بأغنية "أنا مش فاهمني"

وقال في تصريحات خاصة لموقع مصر تايمز: "الأغنية دي التعاون التالت بين أحمد سعد والملحن مدين، وبصراحة من أنجح الحاجات اللي اتعملت بينهم".
وأضاف: "أنا شايف إن الأغنية إضافة جديدة لأحمد سعد، لأنه أصلاً صوته درامي وفيه بحة فيها حزن وشجن، وده اللون اللي بيليق عليه، وهو نجح جدًا في الأداء".

وتابع: "بالنسبة للكلمات، رغم إنها بسيطة لكنها عميقة جدًا، وبتعبر عن حالة ناس كتير، لأن كلنا بنمر بإحباطات واضطراب داخلي، والأغنية قدرت توصل الإحساس ده".

واستكمل: "لو بصينا على التعليقات على السوشيال ميديا زي يوتوب وفيسوك، هنلاقي ناس كتير بتقول إن الأغنية بتمثلهم، وده دليل إنها لمست حاجة حقيقية جواهم".

وأوضح: "الأغنية مش بتحكي قصة، دي بتعبر عن اللي جوا الإنسان، زي حوار مع النفس أو مونولوج داخلي، وده اللي خلاها قريبة من الناس".

وأشار: "اللون ده من الأغاني الحزينة الدرامية بقى قليل اليومين دول، عشان كده الناس كانت محتاجة تسمعه، وده اللي خلاها تنجح".

واختتم كلامه قائلًا: "دي خطوة مهمة في مشوار أحمد سعد، خصوصًا إنه كان معروف بالأغاني الإيقاعية، لكن هنا قدم حاجة مختلفة وقريبة من الناس".

"أنا مش فاهمني".. تجديد التعاون للمرة الثالثة بين أحمد سعد ومدين

تتضمن فعاليات موسم الصيف 2026 تجديد التعاون بين الفنان أحمد سعد والملحن مدين، في أغنية "أنا مش فاهمني"، في الألبوم الحزين، الذي طُرح منذ أيام عبر يوتيوب ومختلف منصات الاستماع في الوطن العربي.

وتعد أغنية "أنا مش فاهمني" من كلمات أحمد عيسى، وتوزيع موسيقي وميكس توما، بينما الماستر لهاني محروس. 

وصرح مدين قائلاً" "تُعتبر أغنية "أنا مش فهمني" من أهم المحطات التي جمعتني مع أخي الغالي أحمد سعد، فهي من أغلى الأغاني على قلبي، ومن العيار الثقيل". تعبيراً عن سعادته باعجاب الجمهور الشديد بها