سيد عبدالحفيظ يهاجم الحكم محمود وفا بعد مباراة الأهلي وسيراميكا كليوباترا.. ماذا قال؟

عبر عضو مجلس إدارة النادي الأهلي سيد عبد الحفيظ عن استياءه الشديد من تغاطي حكم مباراة الأهلي وسيراميكا كليوباترا محمود وفا عن احتساب ركله جزاء لصالح المارد الاحمر في الثواني الأخيرة من عمر المباراة.

سيد عبد الحفيظ يهاجم حكم لقاء الأهلي وسيراميكا كليوباترا 

وتحدث سيد عبد الحفيظ على برنامج الكورة مع فائق: لازم يحصل تحقيق في اتحاد الكرة ازاي حكم يزق ويعتدي على لاعبين داخل الملعب..

وتابع: محتاجين نعرف الحوار اللي دار بين وفا وحكم الفيديو لحظة مراجعة ركلة الجزاء، والحكم متخيل ان طالما معاه الكروت هو بيحمي نفسه..

وواصل: اتحاد الكرة واضح انه بيعاند بشكل واضح مع النادي الأهلي، حتى ماتش الترجي الأخير ده، اتحاد الكرة في تونس اتحرك علشان يأجل نظر الاستئناف.. واتحاد الكرة في مصر متحركش، نفسنا نقول شكرا لاتحاد الكرة

واستكمل: من بكرة لازم يكون في وقفة كبيرة مع اللي حصل، كل الأجواء واضح انها رايحة في اتجاه تاني، لو في فاول ما اتحسبش لفرقة بيتعمل على الحكم حفلة..

وأشار: اول مرة في حياتي يحسب كورنر وبعدين يلغيه، ازاي حكم الفيديو يتدخل في احتساب ركنية.. هذا الامر لا ينفي اننا في حالة فنية صعبة، لكن سنطالب بحقوقنا كاملة في ظل التجاوزات اللي حصلت ضد اللاعبين، ومحتاجين نعرف ازاي يصـدر من حكم ضد حسين الشحات ومحمد الشناوي.

وواصل: انا عايز اسمع حوار الفار مع محمود وفا.. ونشوف ايه اللي اتقال، محمود وفا كان يبحث عن أي زاوية لعدم احتساب ركلة جزاء للأهلي.. طلبنا حكام أجانب لمواجهتي بيراميدز والزمالك، بس مش عارفين نلاقيها منين ولا منين.. يعني مش هينفع نجيب 34 حكم في كل المباريات

واستكمل: احنا بنعمل إعادة هيكلة قوية تليق بالنادي الأهلي، ولكن احنا في مرحلة حساسة حاليا، ولازم نتعامل مع المرحلة الحالية

وتابع: الحاجات اللي بتحصل دي بتبقى واضحة، نفس الأخطاء اتكررت في 2022 ومواسم سابقة، كنت أتمنى يكون لسه الدوري في الملعب ولكن الأمور واضحة في ظل الأخطاء التحكيمية.

وواصل: محمود وفا كان بيدور على زاوية واضحة النهاردة علشان ميحسبش ركلة الجزاء.. مش هينفع نسيب حقوقنا تاني خالص، حتى لو انا وحش وعندي اخفاق وعندي مراجعة مع ذاتي ونفسي في النهاية لازم تدينا حقوق

واختتم: هنطلب من اتحاد الكرة نعرف الحوار اللي حصل بين الحكم والفار، وأيضا التجاوز اللي حصل في حق لاعبين، وايه المبرر اللي تم الاستناد عليه لتعيين الحكم..