عاجل| مافيش رقابة من وزارة الصحة.. برلمانية تكشف عن واقعة مأساوية بعد وفاة أحد أصدقائها
كشفت النائبة أميرة صابر عن واقعة مأساوية داخل أحد المستشفيات بعد وفاة صديق لها وطلب المستشفى مليون جنيه فاتورة.
وقالت النائبة مستعرضة الواقعة: مش قادرة اتجاوز تقل اليوم وقلبي تقيل جداً وحاسة بغضب مش قليل.. فقدت صديق قديم وغالي ولسبب لسه بحاول افهمه بعد تواصل اتقطع لسنين لانعزاله وسفره، كلمني وهو في حالة صحية متأخرة أنه عاوز يشوفني، كان محجوز في رعاية أحد المستشفيات الخاصة.. رحتله طبعاً و كنت متأكدة اني احتمال مشوفوش تاني ربنا يرحمه رحمة واسعة و يصبر أصدقائه.
وتابعت: ليه بكتب شعور خاص جداً هنا ؟علشان مش قادرة اتغاضي عن مناهدة و تليفونات و خناقات طول اليوم علشان المستشفي ترضي ان جثمانه يتدفن لوجود جزء من المبلغ متدفعش لما طلبنا الفاتورة ، اتصدمت !الاسعار ديه للخدمة الطبية المقدمة مش منطقية أبداً الغياب الكبير للرقابة من وزارة الصحة علي الخدمات الطبية المقدمة في المستشفيات الخاصة وضع خاطيء لازم يتغير لازم يكون فيه هامش منطقي للتسعير و سقف لكل خدمة طبية مقدمة ورقابة علي ده.
واستطردت: لكن البنود اللي انا شايفاها قدامي ديه تستدعي ميت سؤال و سؤال يمكن طلب الاحاطة اللي كنت قدمته في نفس الموضوع ده مكنش اتناقش وانا في النواب، لكن بتمني من الزملاء المهتمين يتكلموا فيه و يحاسبوا الوزارة عليه و يبقي فيه حل حقيقي لنزيف الفلوس و الارهاق النفسي في أصعب الأوقات اللي بيمر بيها المريض وأهله ومفيش في الدنيا منطق لتسعير مرن للدرجة ديه من غير سقف و من غير guideline و محاسبة .
وقالت: مفيش اي عدالة ان ناس تبقي بتعمل ثروات طائلة علي حساب ألم ووجع و ديون من غير آلية للحوكمة و المحاسبة مش لازم يبقي موت وخراب ديار!ما تكسبوا يا جماعة، لازم تكسبوا بس بالعقل .
