دنيا جمعة: تقلبات شخصية دهب في «وننسى اللي كان» كانت التحدي الأكبر..وجدل الأعلى مشاهدة لهدف الدعاية|حوار
استطاعت الفنانة دنيا جمعة أن تلفت الأنظار من خلال مشاركتها في مسلسل وننسى اللي كان، حيث قدمت شخصية دهب بتفاصيل إنسانية معقدة جمعت بين الطيبة والصراع الداخلي.
وكشفت دنيا جمعة في حوار خاص لـ «مصر تايمز» أصعب التحديات التي واجهتها، وأقرب المشاهد إلى قلبها، كما تتحدث عن تفاعل الجمهور مع العمل ورأيها في المنافسة بين المسلسلات.
في البداية.. ما أبرز التحديات التي واجهتكِ في شخصية دهب؟
التحدي الأكبر كان في تقلبات الشخصية، لأنها بدأت طيبة وبسيطة وبتحب جليلة جدًا، لكن مع الضغوط اللي تعرضت لها، خصوصًا بسبب حبها لبدر واكتشافها إن جليلة وبدر بيحبوا بعض، ده عمل صراع داخلي كبير، الظروف اللي مرت بيها دهب كانت صعبة ومليانة تحولات نفسية، وده احتاج تركيز كبير علشان أقدمه بشكل صادق.
ما المشهد الأقرب لقلبك في العمل؟
أكتر مشهد قريب لقلبي كان بيني وبين الأستاذة ياسمين عبد العزيز، لما بقولها "إنتي طول عمرك قوية.. إيه اللي جرالك؟".
المشهد ده عملناه أكتر من مرة، وكل مرة كان بيطلع أحلى من اللي قبلها، وكنا حاسين بيه جدًا لدرجة إننا مكناش بنمثل من كتر ما كنا عايشين الحالة.
كيف كانت ردود الأفعال على المسلسل؟
الحمد لله ردود الأفعال كانت كويسة جدًا، خصوصًا من الجمهور اللي بيحب الدراما الاجتماعية الرومانسية، المسلسل كان فيه كل العناصر اللي المشاهد بيحبها، غير وجود ياسمين عبد العزيز اللي دايمًا ليها جمهور كبير بيستناها، فكان في حالة ترقب من قبل عرضه، وفعلاً حقق نجاح كبير.
هل لمستِ تفاعل الجمهور أثناء التصوير؟
آه طبعًا، كنا بنشوف تفاعل حلو جدًا من الناس في الشارع أثناء التصوير، وكان في مواقف لطيفة بتأكد إن الجمهور متابع ومهتم بالأحداث، وده كان بيدينا طاقة إيجابية كبيرة.
هل كنتِ تتوقعين نجاح العمل؟
بصراحة آه، كنت متوقعة النجاح، لأن فريق العمل ليه تاريخ كبير من النجاحات، ودي عادة فيهم من سنين، فكنت واثقة إن المسلسل هيحقق صدى كويس.
هل ساهم العمل في زيادة شعبيتك؟
أكيد، وننسى اللي كان كان سبب كبير في إني أكون جمهور واسع في وقت قصير جدًا، وده شيء أسعدني جدًا.
في النهاية.. كيف ترين الجدل والمنافسة بين المسلسلات؟
شايفة إن الجدل والمنافسة شيء صحي جدًا، لأنه في النهاية بيكون في صالح الجمهور، وكل فريق بيحاول يقدم أفضل ما عنده، أما فكرة الأعلى مشاهدة أو الأعلى أجرًا، فدي في رأيي مجرد دعاية للترويج ومش بتفرق مع الجمهور بشكل كبير.
