السيناريست محمد صلاح العزب يطالب السيسي بإعادة عرض «سفاح التجمع»: ما يحدث اغتيال للإرادة الفنية

ناشد السيناريست محمد صلاح العزب الرئيس عبد الفتاح السيسي للتدخل لإعادة عرض فيلم سفاح التجمع في السينمات، وذلك بعد سحبه من دور العرض بعد ساعات قليلة من طرحه. 

محمد صلاح العزب يطالب السيسي بإعادة عرض فيلم «سفاح التجمع»

وكتب محمد صلاح العزب من خلال حسابه الرسمي عبر موقع التواصل الاجتماعي فيسبوك، قال: صباح الفل يا ريس عبد الفتاح السيسي معاك محمد صلاح العزب، قعدنا مع بعض واتكلمنا في الاتحادية في ٢٠١٤، أنا كنت أصغر في السن، وحضرتك كنت رئيس جديد، أكيد حضرتك فاكر.يا ريت بعد إذنك تشوف موضوع منع فيلم سفاح التجمع بعد ما خد كل الموافقات الرقابية واتصرف عليه ملايين وتعب فيه مئات البني آدمين في كل الأقسام.

أضاف: لأن اللي بيحصل مع فيلم "سفاح التجمع" مش مجرد "تعنت رقابي"، ده "اغتيال" لإرادة فنية حصلت على مشروعيتها الكاملة بـ صك اعتماد نهائي من الدولة عليه ختم النسر.

تابع: كلمة الجمهور، اللي هو الشعب، هي "الاستفتاء" الحقيقي لأي عمل فني، ولما الفيلم يحقق نص مليون جنيه في ساعتين وبأقل من نص عدد النسخ المتفق عليها، والصالات ترفع شعار "كامل العدد".. يبقى دي رسالة واضحة إن الناس عايزة الفن ده، والجمهور هو "الرقيب" الأول والأخير.

أوضح: هيبة "الترخيص النهائي" لازم تكون محصنة، إحنا في دولة مؤسسات، ولما الرقابة تجيز عمل بعد مشاهدة النسخة النهائية، يبقى "سحبه" بعد العرض ضرب في مصداقية الصناعة كلها.

استكمل: العبث ده بيخلي أي مبدع أو منتج أو مستثمر يحط إيده على قلبه، وده مناخ "خانق" لا يليق بمصر اللي بقالها 130 سنة بتعلم المنطقة يعني إيه سينما.

أضاف: ازدواجية المعايير.. "الخواجة والمصري": مش منطقي أبداً نفتح أبوابنا لأفلام أجنبية "دموية" وصادمة ونقول عليها "فن عالمي"، ولما ابن البلد يقدم تشريح فني ونفسي لواقع موجود، نمنعه ونحاصره. هل "الحلال للخواجة حرام على المصري"؟ الفن المصري طول عمره جريء في إطار الحدود المناسبة، والمنع عمره ما كان حل، المنع بيخلق "أسطورة" والعمل الحقيقي بيعيش رغما عن أي مقص.

أوضح: المناشدة دي عشان حق مئات المبدعين اللي تعبوا في الفيلم، وحق الملايين اللي اتصرفت.
وإحنا مش هنسمح إن صناعتنا "تصغر" بفعل فاعل أو بقرار غير مدروس. الفن الحقيقي زي "الميّة"، مهما اتحطت قدامها سدود، بتلاقي طريقها للناس.

أختتم: كامل التقدير لشخصكم الكريم يا ريس وكل سنة وانت طيب.. ومنتظرين رجوع "سفاح التجمع" لمكانه الطبيعي على الشاشة الكبيرة.