عاجل| أسعار مبالغ فيها.. شكاوي من تذاكر مصر للطيران من الخليج إلي القاهرة

حالة من الجدل على مواقع التواصل الاجتماعي بعد شكاوي عدد كبير من المصريين من الأسعار الخاصة بتذاكر مصر للطيران للراغبين فى العودة من الخليج للقاهرة.

وقال أحمد رواد مواقع التواصل الاجتماعي: فين رئاسة مجلس الوزراء ..مصر للطيران النهارده الغت الرحلات الرسميه من الامارات واستبدلاتها برحلات استثنائيه ب 160 الف للفرد ؟ ايه ياجماعه ده هوه المصري بره بيسرق ده طالع عينه كفايه غربته .. يعني لو واحد معاه اسرته يدفعوا 700 الف علشان يرجعوا  ايه القرف ده ايه الجبروت ده ؟.

انا مش بقول نوفر الرجوع ببلاش ذي دول كتيره وقت الحرب . اعملوا رحلات خاصه إنما ليه يتم الغاء الرسميه  ؟.. وهل ده هيحصل اكيد مع باقي الدول  ؟.

وقال متابع آخر:  قريت خبر عن بدء مصر للطيران تسيير رحلات إضافية من دبي والدمام بداية من ٦ مارس وعلشان أنا عارف إن من بداية الحرب فيه أعداد كبيرة من المصريين في الخليج بيدوروا على طريقة يسافروا بيها مصر لحد ما الأوضاع تستقر، لقيت عندي فضول أدخل أشوف أسعار الرحلات دي وكانت المفاجأة!.

وتابع: الرحلة اتجاه واحد من دبي للقاهرة على مصر للطيران يوم الحد للراكب الواحد 165 ألف جنيه! يعني لو المواطن عنده 3 اولاد وزوجته مطلوب منه يدفع ٨٢٥ ألف جنيه علشان يروح مصر بس! والأيام اللي بعد كدة داخلة في 60 ألف للشخص!.

الدمام بقى اللي تذكرتها في العادي أقل من 10 الاف جنيه، والعادي إن الأسرة تسافر كلها رايح جاي ب50 ألف جنيه، فمتاحة من يوم الحد بـ54 ألف جنيه للشخص الواحد (تحديث: بقت بـ73 ألف)!.

واستطرد: هل ده كلام طبيعي؟ العادي في الظروف دي إن الدول بتعمل إجلاء مجاني لرعاياها ولو مش مجاني يبقى بفلوس مخفضة خصوصاً لو على الناقل الوطني اللي موجود أصلا علشان يساعد في الظروف دي، لكن مصر للطيران عاوزة تاخد من المغترب تحويشة سنة كاملة عشان ترجعه مصر رحلة اتجاه واحد.. انتم بتعملوا إيه يا جماعة؟؟ EGYPTAIR.