الجمعة 29 مارس 2024 الموافق 19 رمضان 1445
رئيس التحرير
حازم عادل
حوادث

"فتاة ميت غمر" تناشد النائب العام بالتدخل بعد الحكم ببراءة المتهمين

الأربعاء 24/مارس/2021 - 10:25 م
بسنت - فتاة ميت غمر
بسنت - فتاة ميت غمر

عبّرت الفتاة "بسنت"، المعروفة إعلامًيا بـ"فتاة ميت غمر"، عن حزنها الشديد عقب براءة المتهمين  بالتحرش الجماعي بها بشوارع مدينة ميت غمر فى الدقهلية، مناشدة النائب العام بالتدخل.

وقالت "بسنت" عبر صفحتها الشخصية على منصة "فيس بوك": "أنا لسه منستش يوم الحادثة، لسه المشاهد المرعبة وهما بيلمسوني بتتكرر قدامي، لسه فاكراهم وهما بيتلموا عليا في الشارع وبيلفوا حواليا. فاكرة بصاتهم ليا لما شافوني وباين الشر في عيونهم، فاكرة كل كلمة عن جسمي قالوها، فاكره كل إيد اتمدت ولمست جسمي غصب عني وأنا بصرخ ف الشارع وبحاول أهرب منهم، لحد ما مخي اتشل ومبقتش عارفة أعمل ايه؟ علي مسافة تقريباً 500 متر وأنا بحاول أهرب منهم بأي شكل، 500 متر وأنا بجري وكل الي في دماغي إن يارب الأرض تتشق وتبلعني عشان أختفي من قدامهم".

كما أضافت "فتاة ميت غمر": "منمتش يوم المحاكمة عشان كنت عارفة إن هشوف وشوشهم تاني، كنت عارفة إن هشوف كل الي حصل في يوم الحادثة لما أشوفهم.. الصدمة الي اتصدمتها في المحكمة والراجل الي كان بيهربني صاحب العربية بيغير شهادته وبيقول مكنش في حاجة بتحصل. طيب العربية والموتسكيل اللي كانوا بيجروا بيهم ورايا وأنا ف العربية كانت ايه؟ وسامعين أصواتهم وهما بيهددوني إنهم مش هيسبوني غير لما يغتصبوني طيب كل ده كان ايه؟ واحنا بنهرب منهم علي الطريق كان ايه؟ كنت بحلم يعني!!".

وتابعت: "قلبي اتعصر حزن لما شوفت الفيديوهات اللي نزلوها لما خرجوا من السجن، الناس دي لو كانوا طالوا يدبحوني في الشارع كانوا هيعملوا كده، إزاي أشوفهم وهما خارجين من السجن وكأن محصلش حاجة وكأن كل اللي حصل ده كان وهم في دماغي مش متصور صوت وصورة بالكاميرات".

وأتمت "فتاة ميت غمر": "أنا عرفت إن النيابة العامة حبست متحرش المترو وطعنت علي قضية سيدة الكرم في المنيا وطعنت علي قضية فتاة أجا، مواقف حقيقي عظيمة بس أنا مأخدتش حقي ومأخدتش حق كل بنت بتشوف اللي أنا شوفته وخايفين يبلغوا"، مضيفةً "سيادة النائب العام أنا بترجي حضرتك تكون معايا ومتسبش حقي يضيع وحق البنات يضيع".