«أُطالب بتحقيق رسمي».. أول تعليق من مؤلف «فخر الدلتا» بعد اتهامه بالتحرش|تفاصيل
طالب المؤلف محمد طاهر مؤلف مسلسل «فخر الدلتا» بطولة الفنان الشاب أحمد رمزي، بتحقيق رسمي، وذلك بعد اتهامه بالتحرش مما جعل صناع العمل يحذفون اسمه من على التتر.
أول تعليق من مؤلف «فخر الدلتا» بعد اتهامه بالتحرش
وكتب محمد طاهر من خلال حسابه الرسمي عبر موقع التواصل الاجتماعي فيسبوك، قال: الموضوع في نظري ملوش غير مسارين اتنين: نيابة عامة، وهذا يعني تحقيق قضائي رسمي، ثم إجراء قانوني ملزم.
أضاف: مؤسسة حقوقية تشكّل لجنة تحقيق، وتستقبل الشهادات من أصحابها مباشرة، بدون وساطة، ولا تجهيل، وتسمع أقوالهم، وتواجهني بـ ده، ثم تصدر قرار.
تابع: أنا على تمام الاستعداد للاتنين، وبشجّع بشدة، وممتثل للاتنين، أي حد عنده شكوى ضدي، يتفضل ياخد إجراء رسمي.. أليس هذا واضح كفاية؟ أليس هذا عادل كفاية؟
استكمل: اتقال لي إن البنات خايفين يتكلموا. طيب هل ده منطق؟ تطلع شهادات تنتهك سمعتك، ثم الناس تصدق، وتشيّر، وتشهّر، وتشتم، وتخوض، بدون أي تحقق أو تثبت، أو دليل أو محاسبة؟
نفترض - إزاء هذا السعار المجتمعي المحموم، ولو بنسبة احتمال 1 في الألف - إني برئ. حد يقول لي: أثبت ده ازاي؟ وبعد ما أثبته، أرمم اللي حصل ده ازاي؟
أوضح: حقيقي والله، أنا عايز كل حد يشوف البوست ده، يتمهّل لحظة، ويسأل نفسه: ماذا لو إنت ف نفس الموقف، ناس اتهموك وأدانوك وحكموا عليك وصلبوك، بدون أدنى جهد في التحقق.. تحس إيه؟
أختتم: عموما، أنا قابل وراضي، حمولتي شايلها بصبر ونبل، وعارف إن اللي بيحصل ده بيطرطش علينا كلنا، ناس كتير بتتعرى بشكل مخزي، بتناقض أبسط مبادئها المعلنة، ناس مراعتش أقل حقوق البشر في صون كرامتهم، بينهشوا، وقادرين يبرروا ده، ويشرعنوه ببجاحة. ومقتنع إنه وسط قذائف الخراء المنتشرة دي، أنا أقل الخاسرين، والله.. ربنا يعدينا منها على خير.
