إلهام عبدالبديع عن اعتزالها:«أخدت قرارات غلط ومضطرة أوافق على أدوار مش حباها»
كشفت الفنانة إلهام عبدالبديع معاناتها مع الوسط الفني والشللية به، وموقفها من اعتزال التمثيل.
إلهام عبد البديع تكشف حقيقة اعتزالها
قالت إلهام عبدالبديع في لقائها مع الإعلامية شيرين سليمان ببرنامج سبوت لايت، المذاع على قناة «صدى البلد»: «أنا كنت من ناس معينين بيشتغلوا في حتة معينة يمكن لما قفلت في مصر شوية اتأثرت جامد».
وتابعت: «أخدت قرارات في حياتي غلط وأدوار بوظت جزء كبير من مستقبلي، اختيارات غلط وصلتني للحظة اللي أنا فيها، وأحياناً الغلط في وقت معين بيبقى صح.. لو رجعنا مثلاً لورا كام سنة أنا مش مذيعة أنا ممثلة.. أنا مكاني في حتة تانية».
واستكملت إلهام عبدالبديع: «الناس فاكرة فيه إن أنا بطلت تمثيل والوسط الفني فاكر إن أنا سيبت الشغل، قُلت في الصحافة ونزلت على السوشيال ميديا ومكنتش بقوة خبر الاعتزال فأنا مطلوب مني 6 شهور جايين شغل».
وأضافت: «ارجع وأقول أنا مش مبسوطة باختياراتي الفترة دي خالص.. لكن هي مرحلة وهتعدي».
وفيما يخص موقفها من الاعتزال، قالت إلهام عبدالبديع: «والله العظيم ما فكرت أبطل، يعني الناس ممكن تكون فاهمة إني أنا عملت تريند، أنا مش بعمل تريند، مش أنا الشخصية اللي تعمل تريند بحاجة زي دي، أنا بضر نفسي، الموقف ضرني جدًا، وخلاني آخد قرارات المفروض مخدهاش».
واختتمت: «مضطرة أوافق على حاجات اليومين اللي جايين دول بس عشان أقول أنا بصور وفي اللوكيشن، أنا بقول أنا بعمل مسلسل وبرنامج وأغنية وفيلم، أنا مكونتش حابة أعمل بعض منها، وهي فترة أنا بقع، الفترة اللي أنا فيها دي أنا بقع جامد بسبب الناس كلها تفتكر إني أنا اعتزلت وأنا معتزلتش، ومطلوب مني أحارب كل اللي بيحصل ده بعدما صفحاتي كلها اتهكرت واتكتب إن أنا اعتزلت من صفحاتي، وكان عندي مسلسل مهم جدًا في رمضان وراح مني، وبقول خلاص هو مش نصيبي، مش رزقي، لو كان رزقي كان هيجيلي، بس أنا اتضريت جامد الفترة اللي فاتت، ومعرفش إيه اللي عاجبهم في حياتي الشخصية أكتر من الفنية».
