«لا يوجد مشاهد لأم جاسر».. عودة التحضيرات لـ«روح OFF» وتأجيله لبعد رمضان|تفاصيل
أعلن المنتج بلال صبري منتج مسلسل «روح أوف» عن عودة التحضيرات للعمل، وذلك بعد توقفه الفترة الماضية، بسبب شائعات وجود البلوجر أم جاسر في العمل.
عودة التحضيرات لـ«روح OFF» وتأجيله لبعد رمضان
وقال بلال صبري من خلال مقطع فيديو عبر حسابه الرسمي على موقع التواصل الاجتماعي فيسبوك، قال: «بشكر كل اللي ساندني ودعمني، الدكتور أشرف جه من بدري وشاف المونتاج واتأكد أن مافيش أي مشهد لأم جاسر وقالي اشتغل».
أضاف: «بس أنا قعدت مع بطل العمل منذر رياحنة والمؤلف والمخرج، واتفقنا أننا نعمله بعد رمضان وفي منصة كويسة كلمتني أنها تعرضه عشان زحمة رمضان».
تابع: «فهننزل بمسلسل واحد وهو الضحايا إخراج حاتم صلاح الدين، بشكر أمي اللي بتدعيلي في كل فجر، وفي أي محنة بتجيلي بقف تاني بسبب دعوتها».
استكمل: «لما قرار وقف المسلسل طلع أنا اتفاجئت زيي زيكم، واتفاجئت من كم الناس اللي بعتالي على الواتساب وبتقولي أحسن عشان مخدناش معاك سواء ممثلين أو مؤلفين وناس أنا معرفهاش، في البلاء مافيش شماتة يا جماعة، هتاخدوا ايه من الدنيا ولا أي حاجة، أنا مش فارق معايا خالص، الواحد شغال عشان يفتح بيته بس، سامحوني ومش عايز حد يزعل أنا مش بحب كده واتضايقت من نفسي بعده».
وعلق بلال صبري على الفيديو، قال: «الحمد لله مشكله مسلسل روح اوف انحلت وكل سنه وانتم طيبين وانتظروا مسلسل الضحايا في النصف التاني من رمضان 2026».
