«رفضت أدفع الثمن».. رحمة أحمد تكشف كواليس مؤلمة في الوسط الفني بعد اعتزالها
كشفت الفنانة رحمة أحمد عن كواليس مؤلمة في الوسط الفني تواجه خاصة فئة الشباب، وذلك بعد إعلان اعتزالها الفن مشيرة إلى أنها لم تجد فرصة تبرز موهبتها للجمهور.
رحمة أحمد تكشف كواليس مؤلمة في الوسط الفني بعد اعتزالها
كتبت من خلال حسابها الرسمي عبر موقع التواصل الاجتماعي «فيسبوك»، قالت: «كلام للي مهتم فقط وعلشان في صحافين حابين يتواصلوا معايا ومتشكرة ليهم جدا بس أنا محدش يعرفني ومحدش مهتم بأخباري غير اللي بداوا معايا رحلة وعارفني كويس اللي معظمهم ع صفحتي دي أنا مش جايه اعمل تريند علشان كده ردي هيكون ع صفحتي للناساللي يهمها ردي».
أضافت رحمة أحمد: «أنا مقولتش اتحجبت زي مالصفحات بتنزل ،مع ان ده شئ يسعدني و مش معنى اني مش محجبه اني معرفش ربنا ( ربنا عالم بالنوايا و الناس مالهاش إلا الظاهر ) أنا قولت كفايه تمثيل و مش معنى كده اني بقول أنا توبت، توبت دي لما اكون كنت بستخدم مهنة التمثيل ف حاجة حرام او حاجة غلط و الحاجات اللي اشتغلتها و اختارتها اكبر دليل، لكن بالعكس أنا بحترم الفن جدا جدا».
أوضحت: «يمكن ده سبب ابتعادي عنه لاني علشان اشتغل و أتواجد و يكون ليا ادوار حلوة مضطرة ادفع تمن كبير سواء مجاملات أو اساءات أو تعدي عليا او مساومات من بعض المخرجين و المنتجين و احيانا نجوم، علشان اعمل الدور ده لازم اوافق ع حاجة معينه طبعا مش كل الناس كده و دي مهنه زي اي مهنه فيها الكويس و الوحش، أنا بحترم الفن جدا وبحترم الفنانين اللي بجد».
تابعت رحمة أحمد: «واللي بيقول مين دي دي مظهرتش غير ف عملين تلاته أنا عملت ادوار بسيطة اه برغم اني عملت مسرح كتير وفي سنين شقى و دراسه ولما قالوا اهتموا بالسوشيال ميديا اهتمينا وووووو.. وفخورة بيهم جدا حتى لو أنت شايفهم ادوار مهمشه، جالي فرص اعمل ادوار اكبر و جتلي كتير بس المقابل كان هياخد حته من انسانيتي و صدق مشاعري و اللي عارفني عن قرب عارف أنا بتكلم ف ايه».
أردفت: «وحتى ده دفعت تمنه غالي من الناس، اللي يقولي انتي كومبارس واللي بيقول انتي مش لاقيه اللي يشغلك علشان الفرص المحترمة أو خليني اقول الفرص "الفنية " االلي جتلي ف التمثيل كانت صغيرة وًكنت بقبل بيها لانها كلها اعمال محترمه لمخرجين فنانين و محترمين و قبل كل ده عندهم إنسانيه و أصول في الشغلانه».
قالت: «وأنا حاليا و بقالي فترة كبيرة واقعه ف صراع بين اني اكمل وافضل قوية و استنى الفرصة اللي معتمدة على موهبتي ف عمل حقيقي محترم يحترم موهبتي وانسانيتي.. أو ادفع تمن ده من حياتي النفسية والضغط المادي اللي بتعرضله لقلة الشغل، واستحمل كلام من الناس يوجع و ياكل ف نفسيتي بردو وأتحمل اهانه اني بختار اشتغل ف ادوار صغيرة واعمل مجهود كبير فيها واللي في ناس بتوقفني في الشارع تكلمني عنها وتكون مبسوطة بيها ومستنيه تسمع هشتغل تاني في ايه برغم انها صغيرة جدا.. ولا أبيع قلبي وأبيع صدق مشاعري وأتحول لكائن تاني معرفوش».
أضافت رحمة أحمد: «مكدبش عليكوا حاولت كأنسانه عادي أتكيف واحاول امشي أموري بس معرفتش في حاجة جوايا ف ضميري( ممكن تكون مش صح ف الدنيا دي) .. خلتني معرفش اعمل كده.. معرفتش اتصلق ولا عرفت استغل مشاعر واحد ليا و اطلع عليه ولا عرفت أعشم حد كان ف ايده مساعده ليا لحد ماخد مصلحتي و اطير، معرفتش».
كما أعربت عن حزنها: «أنا أصلا مش عارفة بقول كل الهري ده ليه بس أنا حاسه اني بموت ومش عايزة اموت وأنا شايلة ف قلبي حاجة زي اللي مشيوا ف عز شبابهم عايزة امشي و أنا خفيفه».
ووجهت الشكر لكل من ساعدها بالوسط الفني: أنا متشكرة جدا لاي حد ساعدني ف الوسط ده حتى لو بتشجيع معنوي ، او حاول يديني فرصة حتى لو صغيرة ، او حد قالي انتي شاطرة ده اللي كان بيخليني اكمل و كان بيخليني احس اني موهوبة برغم شكي دايما ف موهبتي.. و مش مسامحة أبدا اي حد اتكلم ف ضهري وانا أصلا ف حالي ، ولا حد كان ف ايده يساعدني و عارف اني استاهل ، ولا حد جه و ساومني على شغل و كان عايز مني خدمة تانيه غير اني اكون ممثلة و اي حد وقفلي شغل علشان ممسكتش الطبلة.
أختتمت: و عايزه اقول حاجة بسيطة للناس.. الفنان المصري اكتر فنان مظلوم و اكتر فنان موهوب و كل العالم بيحترمه خصوصا انه بيشتغل ف ظروف صعبه جدا و براحة ع الناس شوية لان ف ناس ممكن يتكسر قلبها و تم/وت من كلمة انت فاكر انها عادية.. و كلمة كومبارس اللي انت فاكر انك بتجرحني بيها دي متعرفش ف كواليسها أنا كنت بطلة و قوية ازاي.
