أم محمد بياعة الفول والطعمية بالمنوفية تستغيث من بطش شاب: مستضعفني وكل يوم يضربني|فيديو

أم محمد سيدة من المنوفية تتعرض لمأساة تتلخص في قيام شخص بتعقبها واعتياد ضربها ضربا مبرحا ، وأكدت أنها لا تعرف كيف تتصرف خاصة وأنها تعاني من مرض الضغط.

تحكي أم محمد مأساتها خلال بث مباشر لها مع موقع مصر تايمز : الشخص ده بيهددني في كل مكان وكل لما يقابلني بيضربني ومش بيهمه حد وقبل كده رفع عليا مطواه وهددني يضربني بيها .

وواصلت : أنا ست غلبانه وبصحي كل يوم الفجر وبعمل فول وطعمية وابيعها عشان أكسب قرش حلال أصرف بيه علي ولادي ومحتاجش لحد ، وامبارح حسيت بتعب لاني مريضة ضغط ، فقلت أنزل أروح الصيدلية اشتري أي برشام يخفف الألم ، وأنا راحه الصيدلية لقيت الشخص ده ومعاه أخوه وأبوه جايين ورايا وهما راكبين موتوسيكل ، فضل يشتمني بألفاظ قذرة لا يتحملها بشر ، وأنا مبردش ، وفجأة نزل من الموتوسيكل وراح واقف قصادي وضاربني براسه في دماغي ووقعت علي الأرض ، وكل لما أحاول أتمالك نفسي وأقوم أقف يرجع يضربني فأقوم واقعه علي الأرض تاني ، وأنا بصرخ والناس خايفه تتدخل عشان ميعملش فيهم حاجه ، وبعدها ركب مع أبوه وأخوه ومشي .

وأكملت أم محمد وهي تبكي بحرارة : هو عيل عنده 18 سنة ، يعني أصغر من ولادي ، لكنه مستضعفني عشان أنا ست كبيرة وغلبانه ومريضة ، فكل لما يشوفني يضربني ، رغم إني رحت عملتله محضر قبل كده ، وبرضه مفيش فايدة علي طول بيعتدي عليا ، لدرجة أنه ضرب ابني قبل كده وعوره بإصابات شديدة ، ده غير إنه بيجيلي وياخد الفلوس اللي بتطلعلي من رزقي ، وكل شويه يهددني بسلاح شايله في هدومه .

وأضافت : عايزه حقي ، ولو محدش جابلي حقي ربنا هيجيبهولي عشان أنا ست غلبانه وتعبت أوي لحد ما ربيت عيالي وكبرتهم وبقوا موظفين وعايشين كويسين ، واختتمت : ربنا كبير وأكبر من أي حد.