أسامة نبيه يكشف تفاصيل اللحظات الأخيرة في حياة محمد صبري

نعى أسامة نبيه، نجم الزمالك السابق، صديقه ورفيق دربه الكابتن محمد صبري، الذي وافته المنية فجر اليوم.

وقال نبيه عبر قناة "الزمالك": "البقاء والدوام لله، وإنا لله وإنا إليه راجعون، أنا مش عارف أقول إيه الحقيقة، إحنا بنعزي نفسنا وبنعزي الوسط الرياضي كله بكل أطيافه الزملكاوي والأهلاوي".

وروى نبيه تفاصيل تلقيه الخبر الصادم قائلًا: "حد كلمني في التليفون بدري جداً الساعة 6:00 الصبح، رن رنة وقفل، فقلت يمكن حد من جمهورنا يعني، وبعدها بثواني بعت ليا رسالة: (الله يرحمه مات في طريق التجمع)".

وأضاف: "ساعتها قررت أكلم الرقم اللي كلمني، وقال ليا إنه كان في حادثة وهو توفى في طريق التجمع".

وكشف نبيه عن تفاصيل دقيقة سبقت الحادث، نقلًا عن زوجة الراحل: "علطول كلمت السيدة الفاضلة زوجته لأنها في علاقة أسرية بينا، فقالت ليا: (آه اللي حصل كذا وكذا)".

وتابع: "قالت إنه امبارح كان تعبان شوية، كان راجع الساعة 1 أو 1:30 بالليل، وبلغها إنه تعبان وعنده حرقان في صدره، فقالت له: (أجيلك؟) قال لها: (خليكي أنا هاجي)".

وأوضح اللحظات الأخيرة: "لما قرب من البيت كلمها وقال لها: (هتلحقيني على المستشفى)، وهو توفى قبل الحادث، الأزمة حصلت قبل الحادث، وهو فقد السيطرة بعد الوفاة".

وأكد هذه الرواية بناءً على ما شاهده أثناء الغُسل: "هو توفى قبل الحادثة بالضبط، لأننا لما دخلنا عليه في الغُسل مكنش عنده جروح كبيرة أو حاجة تقول إن الحادثة هي اللي أنهى حياته".

وعن تكريم الراحل، قال نبيه بحسم: "محمد صبري يا جماعة… أنتوا بتتكلموا في إيه؟ ده هيتكرم، هيتكرم، والتكريم جاله النهارده من كل الناس اللي جت وكل الناس اللي زعلانه عليه، الوصية هتتنفذ إن شاء الله من خلال بيته الزمالك".

واختتم حديثه بكلمات مؤثرة عن علاقته بالفقيد: "أنا غير كل الناس، ده حياتي كلها كانت معاه لاعب ومدرب، دي عشرة عمر، غير أي حد، لأن في لاعبين بيقضوا حياتهم في الملاعب وخلاص، لكن أنا وهو اشتغلنا مع بعض فترة كبيرة".