أمير هشام يعلن انتهاء مشوار برنامج بلس 90 على قناة النهار

أعلن الإعلامي أمير هشام مقدم برنامج بلس 90 على شاشة قناة النهار عن انتهاء مشوار برنامجه ورحيله عن القناة.

رحيل أمير هشام عن النهار 

وكتب على صفحته الرسمية على فيسبوك: انتهت رحلة بلس 90… شكرًا للأستاذ علاء الكحكي، وشكرًا لقناة النهار.

وتابع: على مدار 3 سنوات تشرفت بتقديم البرنامج من خلال شاشة القناة المحترمة والعريقة.

واستكمل: يمكن دي من أصعب اللحظات اللي بمر بيها، لأني بكره جدًا لحظات الوداع، لكن دي سنة الحياة… كل بداية لها نهاية.

وأشار: حابب أوجه شكر خاص للأستاذ علاء الكحكي، واحد من رواد الإعلام في مصر، واللي منحني فرصة غالية جدًا كنت منتظرها من زمان. تشرفت بثقته واختياره، وده كان تكليف ومسؤولية كبيرة بالنسبة لي. وبشكره كمان على تفهّمه لقراري ورغبتي في الرحيل.

وأوضح: شكر كبير كمان لفريق عمل البرنامج بقيادة أخويا بالمعنى الحقيقي محمود شوقي اللي بعتز به جداً واللي كان دايماً في ضهري، ومقدرش أستغنى أبدًا عن دعمه ونصايحه( وهو فاهم قصدي كويس ) وشكر خاص لأخويا المخلص ورفيق الكفاح عمرو فهمي، ولكل فرد من فريق العمل الغالي جداً على قلبي.

وواصل: وكمان أتوجه بالشكر لكل مسؤولي قناة النهار: الأستاذ فادي علي، والأستاذ محمد هاني رئيس شبكة تلفزيون النهار، والاستاذ رائد، والأستاذ سامي عبد الراضي، والأستاذ جازوي، والأستاذ والي وبالتأكيد لكل زملائي من مخرجين وبروديوسرز وعاملين وغيرهم.

واستكمل: شكرًا من القلب لكل حد شاركني الرحلة دي، لكل واحد حب البرنامج أو حتى انتقده… كلامكم كله على راسي وبتشرف بيكم.

وأكد: هيفضل برامج بلس90 غالي عندي اوي وفي مكانة خاصة جداً بالنسبالي.

واستكمل: أتمنى أكون كنت عند حسن ظنكم… واللي جاي أحلى بإذن الله ونتقابل على خير قريب في رحلة جديدة ان شاء الله تعالى ….

واختتم: هتوحشوني جداً.