أرملة تفترش الشارع مع أطفالها في المنوفية: نفسي في بيت يأويني ويستر عيالي (فيديو)

في مشهد مأساوي يعكس معاناة إنسانية قاسية، تفترش سيدة من مركز الباجور بمحافظة المنوفية الشارع مع أطفالها منذ عشرة أيام، بعد وفاة زوجها وتراكم الإيجار عليها، ما دفع مالك المنزل إلى طردها وتركها بلا مأوى أو مصدر دخل.

الأرملة  سماح سعيد عوض، تروي قصتها قائلة: "أنا متزوجة من 22 سنة، طول عمرنا متبهدلين، وأسرة جوزي مكنتش كويسة معايا، جوزي جاله مرض في أول السنة وتوفاه الله، وبعد وفاته أشقاؤه عملوا معايا مشاكل كتير، قعدت في بيت إيجار، لكن لما الإيجار اتراكم 3 شهور، صاحب البيت طردني، وملقتش مكان أروحله غير الشارع."

وتضيف السيدة "كنت بشتغل في نظافة البيوت وأسدد الإيجار من مساعدات الناس، لكن مرضي وقفني وحتى عفش البيت بعته علشان أعالج جوزي وأسدد ديون، دلوقتي أنا وأولادي اللي أعمارهم من 16 لـ7 سنين مشردين في الشارع من 10 أيام، وبنبات على البحر، طول الليل مش بنام من الخوف على عيالي."

ورغم ما تمر به، أشارت إلى أن بعض الأهالي يحاولون مساعدتها بما يستطيعون "الناس هنا بيجيبوا أكل أو غطا، لكن ده مش كفاية."

وفي ختام حديثها استغاثت قائلة"نفسي في مكان أعيش فيه أنا وعيالي، أو أي مشروع صغير أشتغل فيه وأصرف على أولادي، مش عايزة أكتر من ستر وبيت يأوينا"