السبت 27 أبريل 2024 الموافق 18 شوال 1445
رئيس التحرير
حازم عادل
توك شو

لميس الحديدى تكشف تفاصيل حادث عمرو أديب وتوجه الشكر لـ 4 شباب

السبت 20/فبراير/2021 - 11:10 م
لميس الحديدي
لميس الحديدي

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء الماضي.

قالت الحديدي عبر برنامجها "كلمة أخيرة" المذاع على قناة "ON"، اليوم السبت:  "عاوزه  أتكلم في موضوع مالوش علاقه بالشغل، عاوزة أطمن كل الناس اللي بتسأل على عمرو بعد الحادثه الصعبة اللي تعرض لها مساء الثلاثاء الماضي ، أنه الحمد لله بخير بشكل عام ربنا نجاه بأعجوبة الحقيقه لأن العربيه اللي خبط فيها واللي وقفت فجأة، كانت محملة بأنابيب بوتاجاز فكان ممكن تنفجر في أي لحظة".

تابعت: "الدكاترة طمنونا علي حالته عموما، لكن هو لسه بيعاني من الام مبرحة غالبا من الكدمات والردود نتوقع انها تاخد بعص الوقت، وإن شاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تاني، وانا طبعا  ماكنتش هقدر انزل الشغل او أكون معاكم إلا وأنا مطمئنة عليه انه بيتماثل للشفاء وأن حالته تسمح أني اسيبه بعض الوقت، لأن في مثل هذه الاحداث دوري كزوجة بييجي قبل دوري كإعلامية".

وجهت الإعلامية الشكر للجمهور ولكافة المسؤولين  في الدولة قائلة: "عاوزة أشكر كل الناس اللي سألوا علينا وعليه من  أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعا،  زملاءنا الإعلاميين، الفنانين من كل الوطن العربي، الدكاتره اللي كانوا بيكلموني ، مستشفي دار الفؤاد اللي انقذت عمرو في اللحظات الأولى، ألفا سكان اللي دايما في ضهرنا، وطبعا أصدقائي وأصدقاء عمرو اللي ماسابونيش لحظة واحدة، باعتذر أنى ماكنتش بارد علي الاتصالات، لكن ممتنين  جدا لاهتمامهم، وحبهم اللي حسينا بيه".

كشفت لميس الحديدي لأول مرة عن هوية أربعة شباب كان لهم دورًا كبيرّا في إنقاذ زوجها الاعلامي عمرو أديب للمستشفى وإنقاذه، قائلة: "أنا هنا  سأخص بالشكر 4 شباب بالاسم لانهم هم دول اللي نقلوا عمرو المستشفى بعد الحادث مباشرة وفضلوا معاه لحد ما أنا وصلت مباشره بعد الحلقه يوم الثلاثاء، المهندس مصطفي عزب، الدكتور كريم النحاس، دكتور طارق سلامة،  المهندسة داليدا، الشباب دول انا مااعرفهومش، لكنهم تصادف وجودهم في نفس مكان الحادث ونقلوه المستشفى وفضلوا معاه لحد وصولي وكملوا معايا لحد ما اتطمنوا عليه، الشباب دول أنا صممت اخد أساميهم علشان اشكرهم بنفسي ، فيه لسه ناس محترمه بجد". 

يذكر أن برنامج "كلمة أخيرة" تقديم الإعلامية لميس الحديدي ويذاع من السبت إلى الثلاثاء في تمام التاسعة على شاشة "ON".