شوبير:حسن حمدي قالها من زمان.. اللاعب المحترف لا يعرف إلا كرة القدم
هاجم الإعلامي أحمد شوبير، خلال برنامجه الإذاعي على "أون سبورت إف إم"، تصرفات أحمد فتوح، ظهير أيسر نادي الزمالك ومنتخب مصر، بعد غيابه الأخير عن التدريبات بداعي ظروف عائلية، قبل أن يظهر في إحدى الحفلات، ما أثار علامات استفهام داخل أروقة النادي وبين الجماهير.
وقال شوبير: "فيه مثل بيقول اللي اتلسع من الشوربة ينفخ في الزبادي، لكن فتوح واضح إنه بيشرب الشوربة وهي مولعة! الزمالك تعامل معاه بشكل محترم جدًا بعد أزمته في الصيف الماضي، سواء من حيث الإعداد البدني أو إعادة مشاركته تدريجيًا، وده يُحسب للإدارة حتى لو الفلوس اللي اتصرفت ما كانتش من خزينة النادي".
وتابع: "اللي حصل قبل كده كان قضاء وقدر، ما بننكرش، لكن كانت ليه خلفيات معروفة، مش عايز أخوض فيها. إنما إنك ترجع وتكرر نفس الموقف وتقول إنك غايب بسبب ظروف عائلية، وتظهر في حفلة؟ ده أمر غير مقبول. أنا مش ضد إنك تحضر حفلة، لكن قول الحقيقة، وكن واضحًا مع ناديك".
ووجّه شوبير رسالة مباشرة للاعب قائلًا: "مش هينفع يا أحمد يا فتوح، إنت لاعب دولي ومؤثر في الزمالك، ومفروض تكون قدوة ، لازم تختار، يا طريق الاحتراف والانضباط، يا طريق السهر واللا مبالاة ، الاتنين مش هيمشوا مع بعض".
كما استشهد شوبير بكلمة شهيرة للكابتن حسن حمدي، قائلًا: "كان دايمًا يقول: وإنت بتلعب كورة، مش هتعرف غير إنك تلعب كورة، والزمالك النهاردة بيتعامل بجدية في ملف الانضباط، وقرار الإيقاف وتوقيع غرامة مليون جنيه على فتوح مش مجرد قرار على الورق، لأ، بيتنفذ بالفعل".
واختتم شوبير تصريحاته بالتأكيد على أن اللعب لأندية بحجم الزمالك، أو تمثيل المنتخب الوطني، يتطلب التزامًا كاملًا واحترامًا للجماهير، مشددًا على أن الانضباط هو طريق النجاح لأي لاعب
