عاجل.. رجعوا بنعشهم بدل خطوبتهم.. أول ظهور لوالدة سائق ميكروباص حادث الإقليمي بالمنوفية

انهارت والدة أدهم سائق الميكروباص الذي لقي مصرعه في حادث الطريق الإقليمي الدائري بالمنوفية .

وقالت في بث مباشر مع موقع " مصر تايمز"،" أنا مش مستوعبة اللي حصل .. كان خطوبته الجمعة الجايه على ملك واهو  الأتنين راحو في الحادثة ورجعوا بنعشهم".

وكانت حبيبة، إحدى الناجيات من كارثة الطريق الإقليمي التي لا تزال تتلقى العلاج قالت لـ"مصر تايمز": "وقت ما فوقت في المستشفى كنت بسأل على البنات.. قالولي كلهم ماتوا، ما عدا أنا وآية بنت عمتي، وبنت تانية اسمها إسراء.. الصدمة كانت أكبر من التحمل".

وأضافت "أنا بشتغل بقالى سنة، وكنت لسه مخلصة امتحانات يوم 2 يونيو، وبجهز للمعادلة عشان أحقق حلمي وأدخل كلية تجارة. نزلت أشتغل علشان أقدر أوفر مصاريف المعادلة".

وتابعت "قبل الحادث بيوم، اتجمعنا أنا وآية وسمر  بنات عمتي  في بيتنا، وسهرنا سوا، وسمر نامت معايا، كأنها كانت بتودعني. وتاني يوم روحنا الشغل كعادتنا آخر حاجة فاكراها إننا كنا في شما، جبنا قرص وفطرنا، وبعدها كل حاجة ضلمت فوقت في المستشفى".

واستكملت حبيبة حديثها: "أنا بتمنى من الناس تدعي لـ آية بنت عمتي، ربنا يشفيها ويصبرها، لأنها فقدت اخواتها كلهم ومفضلش غيرها.. الحادث ده كسرنا كلنا، ومش قادره أصدق اللي حصل لحد دلوقتي".

وأكدت "مش قادرة أنزل الشغل تاني نفسيا مش مستوعبة، والطريق دايما خطر وصعب جدا، وكلنا كنا بنخاف منه، بس ماكانش قدامنا اختيار"

وطالبت حبيبة نفسي الدولة تعاقب السواق اللي تسبب في موت  بنات عمتي وأصحابي  لازم يتحاسب علشان ناخد حقهم ونرتاح