على قاسم: "عمرو وردة متحرش جنسي.. وتورتة الجزيرة مشكلة علشان دول ستات"

أعرب الفنان على قاسم عن غضبه من قضية التحرش الجنسي عامة، وبشكل خاص من ما أثير من شائعات مؤخرا حول تحرش عمرو وردة لاعب فريق باوك اليوناني بإحدى الفتيات من خلال رسائل إلكترونية، من خلال مقطع فيديو عبر حسابه على موقع التواصل الاجتماعي "انستجرام".

وقال "قاسم": "أنا عايز أتكلم بشكل عام عن قضية التحرش الجنسي وبشكل خاص عن عمرو وردة، أنا مش تمام إن واحد زي عمرو وردة متحرش جنسي يبقي في منتخب مصر لكرة القدم".

وأضاف: "ده بيدي رسالة مباشرة إن إحنا تمام مع قضية التحرش الجنسي وإن ده مش حوار"، متابعا: "مشكلة عمرو وردة لما حصلت من سنة ونص الناس اتقسمت نصين، وفي رأي بيقول مينفعش تنهو مستقبلة وفرصة تانية، أنا مختلف مع الرأي ده بنسبة 100%".

وأردف: "لأن البنت أو الست اللي بيتم التعدي عليها مبتاخدش فرصة تانية في إنها ترجع بالزمن والموقف ده يبقي أكنه محصلش، وبالتالي مينفعش هو كمان يكون عنده الحق ده".

وتابع: "في ناس قالولي حط نفسك مكانة، أنا ليه أحط نفسي مكانه!؟.. أي شخص سوى المفروض يبقى عنده ثقة أنه عمره ما هيتحول لمتحرش جنسي، ده اختيار واضح وصريح الشخص ده بيختاره، بذات لما يكون واعي وشحط".

وقال حول اعتذار عمرو وردة السابق: "عمرو وردة الاعتذار الي طلع قدمة بعدها ب 3 أيام، مكنش موجه أصلا للستات والبنات الي تم التحرش بيهم، ده بس كان عشان يرجع يلعب، وهو تكرم من 3 أسابيع وسحب الاعتذار ده خالص، وقال أنا بس لاعتذرت عشان أرجع العب أنا أصلا معملتش حاجة".

وأشار إلى رفضه التغاضي عن تراجع "وردة" في الاعتذار، قائلا: "لا أنا عندي مشكلة كبيرة مع إن الموضوع دة يعدي بالساهل، كل الشغل إلى اتعمل من منظامات مختلفة هيروح هباء".

وأختتم: "بالنسبالي قضية نادي الجزيرة والكيكة بتاعت نادي الجزيرة اللي تبان مضحكة، هي قصة بائسة جدا راجعة لانهم ستات، لأن دول لو كانوا رجالة غالبا مكنش هياخد الضجة دي، ولو انتشر على السوشيال ميديا كان هيبقى الرأي العام إن دول رجالة عواجيز دمهم خفيف، لكن عشان هما ستات الموضوع واخد الصورة دي".