أحمد فلوكس للنائب رياض عبد الستار: "وقت الانتخابات بتجروا تتصورا معانا"
الخميس 21/يناير/2021 - 12:06 م
علق الفنان احمد فلوكس، على تصريحات النائب رياض عبد الستار الأخيرة بالشكر والتقدير للفن، بعد تصريحاته السابقة المسيئة للفن والفنانين ووصفهم بالمفسدين في الأرض.
ونشر "فلوكس" صورة عبر حسابه على موقع التواصل الاجتماعي "انستجرام"، معلقا: "أنا مكنتش حابب أبدأ أتكلم في الموضوع ده ولا أي موضوع يخص البلد أو أي حاجه وأكون في حالي.. ولكن بصراحة مقدرتش أسكت عن ما قاله الأستاذ رياض عبد الستار عضو البرلمان .. لأن ماقاله لا يمس شخصي و مهنتي وزملائي وحياتي فقط.. ولكن يمس أيضا أبويا اللي رباني وعلمني من مهنته اللي أحبها وأعطي من عمره سنين و سنين لها".
وأضاف: "اعتذارك غير مقبول بالنسبالي أنا.. يا سيدي النائب لما الفنانين بيفسدو في الأرض إنتو بقى بتعملوا إيه، طب يا عضو باشا لما وقت الانتخابات بتاعتكم بيجي بتيجو تجروا علي فنانين مصر علشان تتصوروا معاهم و يقولوا فيكم كلمتين حلوين لأن إنتو عارفين إن فنانين مصر الناس بتصدقهم وبتحترم شخصهم وعارفين إنهم أفيد من حضرتك وأشباهك مش مفسدين زي ما قولت يا ستاموني ..... من الواضح إن انشغالك بالمال والسلطه بعدك أولا عن دينك لأن الدين بيقول ماتتهمش الناس في حياتهم وأعراضهم ولا تظلم ولا تغتاب ولتقل خيرا أو تصمت وحاجات كتير".
وتابع: "وبما إنك لا تعي لدينك فأصبحت أنت من المفسدين في الأرض ليس عباد الله.. ثانيا من أنت لتحاكم وتتكلم بلسان الدين وتصف عباد الله بهذا الوصف القاصي.. اللي بيحاسب يا نجم هو الله فقط و ليس عباده".
وأردف: "ثالثا من الواضح أيضا إن انشغالك بالمال والسلطة بعدك عن إن تكون رجل مثقف وواعي ومدرك للامور، وهذا ليس صادم لي لأن اللي من نوعيه حضرتك تمامه هو الكلام فا تمامك هو ما تقوله فقط و لكن فعل لن تفعل المطلوب، وهذا اتضح للعامه بعد رأيك اللي طلع من لسانك وهذه للاسف بداية غير موفقه و للأسف اعطتني صوره سيئه احبطتني أنا شخصيا عن البرلمان وخصوصا إن هذة الدورة مهمة جدا و أساسيه وعلي أعضاءها التحرك والفعل الازم للشعب المنتمي ليه،وإن يكون فعال وموثر مش زي حضرتك كده بتتكلم و خلاص ومش عارف حتي تتكلم ولا عارف اللي بتتكلم فيه حتى ايه ولا عارف تختار ما تقول ... فأنصحك أن تجلس في مكان كده علي جنب طول فتره دوره البرلمان الحالي علشان الدوره دي محتاجة ناس بتفهم بجد مش بتوع كلام وخلاص وتكون واجهه مشرفه للبرلمان ده و دورته الحالية وأعتقد إن هذا متوفر في أعضاء كتير في هذة الدورة أملنا فيهم كبير فا بالبلدي كده ماتلطهمش معاك يا نجم بوجودك".
واختتم: "إقراء تاريخ الفن جيد وتاريخ البلد اللي إنت فيها عضو برلمان لتعلم جيدا من هم فنانين مصر.. إسال أهلك يا حبيبي من هو فواد المهند س، من هو عبد الحليم، من هي أم كلثوم، ومن هو عبد المنعم مدبولي، و كثيرون و كثيرون لا حصر لهم.. إقراء تاريخ يا حبيبي وأعرف فنانين مصر ازاي كانوا".
