أكرم حسني: أول عيدية من جدى كانت 50 قرشا
هنأ الفنان أكرم حسني الشعب المصري الكبير والأمة العربية والإسلامية بحلول عيد الفطر المبارك، متمنيا أن يكون عيد خير وبركة على الجميع، قائلا: "العيد بالنسبالنا كده لمة وفرحة، ودايما كان فيه طقوس كده بتاعت تجميعة العيلة كلها، ويوم العيد بتبقى لابس ومتأنتك قوي كده ومعروف إن ده لبس عيد مش لبسك العادي يعني".
وأضاف أكرم حسني: "فاكر إن العيدية كنت باخدها من جدي حوالي ربع جنيه أو 50 قرش ودي كانت أول عيدية باخدها، وبعد صلاة العيد على طول أول كوباية شاي بلبن وتسقي فيها بسكوت النشادر اللي ليه طعم وريحة، بالنسبالنا كانت الملاهي دي هي العيد، نلعب ونتمرجح ونرجع آخر اليوم".
ونشرت قناة dmc، رسالة صفاء أبو السعود بمناسبة عيد الفطر، حيث قالت صفاء: "أحلى ما فى العيد لمة العيلة والفرحة لما بلاقى كل حد داخلنا البيت بيدينا عيدية نشترى شكولاتة وعصير وبحب اسمع تكبيرات العيد والكعك الغريبة وطبعا البنات فستان العيد ده من المقدسات لازم ابيته جنبى والشراب والجزمة ودلوقتي ببقي فرحانة أن كل بيت بيبقي فرحان بأغنية أهلا بالعيد دي اكتر شيء بيسعدني ".
ونشرت قناة dmc، رسالة من النجم محمد رمضان لأسر شهداء مصر، حيث قال: "واحنا بنحتفل بالعيد مش لازم ننسى اللى بسببهم احنا بنعيد ومبسوطين، وهما شهداء الوطن اللى ضحوا بروحهم عشان مصر.. مصر عمرها ما هتنساكم ولا تنسى ولادكم.. وولادكم فى رقبتنا ليوم الدين وكل سنة ومصر طيبة".
كما نشرت قناة dmc، رسالة النجم أحمد حلمى لأسر شهداء مصر، حيث قال: "واحنا بنحتفل بالعيد لازم نفتكر أبطالنا شهداء الوطن اللى ضحوا بأرواحهم، ولولاهم مكناش هنبقى عايشين فى أمن وأمان وبنعيد واحنا مطمنين، علشان كده بنقول لكل شهداء الوطن هنفضل فاكرينكم وحافظين جميلكم وولادكم أمانة فى رقبتنا".
