يارا أحمد: مي عمر اشتغلت على نفسها وأعلى نسبة مشاهدة ليه نصيب من إسمه

حلت الكاتبة الصحفية يارا أحمد ضيفة على برنامج صباح البلد والذي يذاع على قناة صدى البلد، وتحدثت يارا أحمد عن مسلسلات الموسم الرمضاني لعام 2024.

وقالت يارا عن اهتمام الفنانين بتواجدهم داخل موسم رمضان: مش كل الفنانين عندهم شرط يبقى موجود جوا رمضان أو برا رمضان ده هيوصل للجمهور وده هيوصل للجمهور على قد ما بقى همهم النجاح بس بقينا بنشوف إن في مسلسلات بقت علامة في رمضان مش هينفع تنزل برا رمضان زي المداح أجزاءه كلها ارتبطت في رمضان والجن والأسطورة وكل ده ارتبط برمضان ده مش هينفع يتعمل منه جزء جديد برا رمضان مش هيتشاف.

وتابعت: جمهور رمضان مختلف، جمهور رمضان مامتي وبابا وجدو وجدتي ويقعدوا قصاد التلفزيون بعد صلاة التراويح يتفرجوا على حاجة وفي العادي كل واحد بيبقى ملهي في مواعيد شغله في رمضان لإن مواعيد الشغل في رمضان بتبقى مختلفة وكل واحد بيروح ينام ويصحى فمش هيبقى في اهتمام بمسلسل 30 حلقة.

وأضافت: إحنا دلوقتي في الأوف سيسزون كله أو معظمه بيكون 15 أو 10 حلقات ولو 30 هيبقى عبارة عن حكايات كل حكاية 3 أو 4 حكايات وخلاص ده بقى مؤخرًا وفي حاجات هتبقى حلقة واحدة وفي مسلسل بيتحضر دلوقتي هيبقى حلقة واحدة.

واستكملت: إحنا عندنا مسلسلات كتير في الموسم والحشاشين أبرزهم وأضخم إنتاج درامي ولا خلاف عليه، والمسلسل ده عامل نسب مشاهدة عالية جدًا، موضحة: كريم عبد العزيز نجم كبير وليه شعبية وجماهيرية لا خلاف عليها بس الحشاشين كقصة الناس عايزة تشوفها ومتحمسة إنها تشوف حسن الصباح ده هيعمل ايه وعمل ايه في حياته وقصته عاملة إزاي، مع وجود كريم عبد العزيز وبيتر ميمي وعبد الرحيم كمال كل دي عوامل نجاح للمسلسل والديكور وكل حاجة، وأحمد عيد عامل دور ميخلناش نعرفه وكل النجوم شغالين على نفسهم حلو  أوي في مسلسل الحشاشين، وشايفة إن خلاف الفصحى والعامية اللي الناس عمالة تتكلم عليه إن ده أحسن حاجة عشان الناس تفهم أصلًا، والعامية بتوصل أسهل للناس ولفئات كتيرة.

وأوضحت إنه اللغة التي كان يتحدث بها حسن الصباح غير معلومة إن كانت فصحى أم عامية.

وأكدت: وعندنا جودر هيتعرض آخر 15 يوم في رمضان، والنجم ياسر جلال أعتقد إن المسلسل ده هيبقى مفاجاءة للجمهور ونشوف ياسر جلال في شهريار.

وأشارت إلى إن الحكم على العمل يكون بعد نصف رمضان، وقالت: بما إن معظم المسلسلات 15 حلقة فممكن أحكم من الحلقة السابعة ودلوقتي لسه بدري على الحكم، واللي شدني مسلسل أعلى نسبة مشاهدة كان مفاجاءة بالنسبالي وياسمين أحمد كامل مخرجة شاطرة وسلمى أبو ضيف ممثلة بتشتغل على نفسها وعرفت تتطور من نفسها وليلى أحمد زاهر مفاجاءة بالنسبالي وطريقة الكلام ولغة الجسد ومحمد محمود هايل وانتصار هي الحصان الرابح بالنسبالي في دراما 2024 وظهرت في أشغال شقة حلقتين كسرت الدنيا، وأعلى نسب مشاهدة ليه نصيب من إسمه، ويجي في المرتبة التانية نعمة الأفوكاتو والناس لما بتسمع مي عمر ومحمد سامي لو اتقال كلمة حلوة في حقهم محمد سامي علطول بنقول في حقه كلام حلو لكن لو مي عمر الناس بتقعد تنتقد ومي عمر نجمة كبيرة وبتشتغل على نفسها كويس وأتطورت وإجتهدت والسنة اللي فاتت إتفرجت عليها هي وروبي وعجبني والسنادي هي فظيعة وفعلا محمد سامي لازم يقفل بقفلته كل حلقة، والمسلسل مي شاطرة جدًا وشغالة على نفسها، أحمد زاهر مفاجأة بالنسبالي عامل دور اللي هو الراجل النطع بالظبط مش سايب أي حاجة وكل الكاست بتاع نعمة الأفوكاتو.

وكشفت عن رأيها في مسلسل صيد العقارب، قائلة: صيد العقارب تحفة وغادة عبد الرازق هتعود لتنتقم وهي كانت طيبة أول حلقتين بس هي دلوقتي بتعود لتنتقم لأخوها اللي إتقتل محمود عبد المغني، وجاميكا أنا بقيت بشوفه نجم من نجوم الدراما وجاميكا إختلف وبقى في حتة تانية، وصفاء جلال مبسوطة بيها جدًا بعودتها للدراما عندها 3 مسلسلات السنادي صلة رحم عندها المداح 4 وصيد العقارب ودي عودة موفقة جداً لصفاء جلال عاملة 3 أدوار مختلفة تمامًا.

وعن رأيها في مسلسل صلة رحم، قالت: قصة شائكة جدًا تأجير الأرحام وهو أول مسلسل بيقول القصة بكل تفاصيلها، وصلة رحم من أحسن المسلسلات اللي بتتناول قضية شائكة السنادي وقضية تأجير الأرحام مش كل الناس بتتناولها بالشكل ده وكمان إياد نصار ويسرا اللوزي عاملين أدوار هايلة.