"قالوا لفرعون إيه فرعنك".. شوبير يفجر مفاجأة بشأن اتحاد الكرة
الأربعاء 30/ديسمبر/2020 - 12:19 م
فجر الإعلامي أحمد شوبير مفاجأة خاصة برئيس اللجنة الثلاثية لإدارة اتحاد الكرة أحمد مجاهد، مشيرًا إلى أن من يدير اتحاد الكرة هو شخص واحد فقط.
وقال شوبير في برنامجه الإذاعي "ساعة مع شوبير" عبر قناة "أون سبورت إف إم": "أحمد مجاهد قال للشركة الإسبانية المسئولة عن الفار مش هدفعلكم فلوس، و الشركة الإسبانية عاوزه 100 ألف يورو، واللجنة الثلاثية قالت لهم عندنا ملاحظات، وبعدين قالوا هنلغي الفار، وهنجيب الأندية ولو قالت لا ميتلغيش يدفعوا فلوسه".
وتابع شوبير: "عملنا اجتماع وأنا في اتحاد الكرة، وكان هاني أبوريدة رئيس اتحاد الكرة، وشارك في الاجتماع 18 ناديًا وقالوا كلهم عاوزين الفار، وأنا اقترحت إن الأندية تدفع جزءا والاتحاد جزءا لكن هاني أبوريدة وقال لا دول 18 مليون بس وإحنا اللي هندفع ومعانا فلوس".
وأردف شوبير: " الاقتراح اللي اقترحته قبل كده بيتعمل دلوقتي لا إله إلا الله، والناس اللي في اللجنة قالت مش دي الأجهزة اللي احنا اتفقنا عليها، ولو الأندية مدفعتش الفلوس هنلغي الفار".
وواصل شوبير: " هي اللجنة دي جايه تلغي أي حاجة عملها الاتحاد اللي فات، المفروض تلغي التقنية ولا تطورها؟".
وأضاف شوبير: " قالوا لفرعون ايه فرعنك قال ملقتش حد يلمني.. هتقولي فيفا هتقولي بيفا هتقولي توتو.. لا يمكن السكوت على ما يحدث في اتحاد الكرة، إذا كانت المناصب لخدمات بعض الأفراد يبقى عليه العوض".
واختتم حديثه موجهًا رسالة لأحمد مجاهد:" لو اتكلمت هتلاقي المثلثات اشتغلت والجبر والتفاضل".
