محمد مهران يكشف كواليس كتابة مسلسل "لؤلؤ"

نشر الفنان محمد مهران، علي صفحته الخاصه عبر موقع التواصل الاجتماعي "فيس بوك" صور وهو يحمل سيناريو مسلسل "لؤلؤ" ويعبر عن فرحته بأنه أول عمل من كتاباته.

 قائلًا: "مبروك لكل صناع مسلسل "لؤلؤ" مبروك يا مي، إن شاء الله المسلسل يعجب الناس ويحبوا لؤلؤ وانتي تعبتي كتير في المسلسل وأكيد ربنا هيجازيكي علي قد تعبك. 

أما بالنسبه لشعوري بفرحتي وأنا بقرأ اسمي و مكتوب جمبه ( سيناريو و حوار ) إحساس مش عارف أوصفه.

بس أقدر أوصف أول حاجة جات في بالي وأنا بتفرج علي أول مشهد من مسلسل "لؤلؤ"، إفتكرت مكالمه جاتلي يوم 26/7/2020 من الأستاذ محمد سامي، قالي فيها ايه رأيك تكتب سيناريو و حوار مسلسل "لؤلؤ" ، أكتر حاجة استغربتها إني عمري ما قولتله إني بحب الكتابه او حتي هو قرالي أي حاجة .. و بصراحه في الأول خوفت من المسؤوليه الكبيره دي بس قررت أخوض التجربه.

و إكتشفت إني إهم حاجة طلعت بيها من التجربه دي إني إتعلمت كتير من الشخص اللي ليه فضل عليا بعد ربنا سبحانه و تعالي إني أعرف أكتب مشهد من بدايته لنهايته .

من اول ما قالي المشهد يتكتب بالورقه و القلم لحد أخر كلمه تتكتب في المسلسل 

الشخص ده هو الاستاذ محمد سامي اللي لازم يكون أول شخص اشكره ، مش لكونه اداني فرصه إني أكتب السيناريو و الحوار للمسلسل و بس ، ده لانه علمني يعني أيه أكتب سيناريو و حوار و ده شئ هفضل فاكره فأي مشهد لأي عمل هكتبه بعد كده شكرًا و شكرًا و شكرًا لربنا انه قدر إني أتعلم كتابه الدراما علي ايدك". 

ويذكر أن عرضت أولى حلقات مسلسل "لؤلؤ" أمس الأحد على شاشة "ON".

مسلسل "لؤلؤ" بطولة مي عمر، محمد الشرنوبي، نجلاء بدر، إدوارد، هيدي كرم، سلوى عثمان، نرمين الفقي، عماد زيادة، حمدي هيكل، تأليف زينب عزيز وإخراج محمد عبد السلام وإنتاج شركة "سينرجي".