بعد نجاحه وإشادة الجمهور به فى "عيشها بفرحة".. مروان يونس لـ "مصر تايمز": سعيد بالتجربة وفريق العمل متعاون.. وأستعد لفيلم كوميدي جديد ديسمبر المقبل".. وموقف محمد سلام "شجاع جدا" فى الوقت الراهن
استطاع مروان يونس أن يلفت الأنظار من خلال دوره بمسلسل “ عيشها بفرحة “ وقدم دور مميز وأداء رائع للغاية، وحصد إشادات الجمهور عن هذا الدور وبراعته فى تقديمه .. الفنان مروان يونس تحدث لـ ” مصر تايمز” عن هذا الدور وعن مواقف أخرى كثيرة فى السطور التالية..
حدثنا فى البداية عن التحضير لدورك في مسلسل " عيشها بفرحة " وهل كان هناك صعوبات واجهتك أثناء تحضيرك ؟
“بصراحة شديدة الدور بالنسبة لي كان سهل جدا في التحضير ساعة لما اتعرض عليا بسبب بحكم شغلي إن أنا Creative Director فاتعاملت مع مخرجين إعلانات كتير، وبعدين لما بقيت ممثل شوفت مخرجين كتير في حياتي فا بقى عندي ريفيرانس، وبقى عندي مراجع كويس برجعلها ومعظم صحابي مخرجين فا لما بعطل في سؤال بسألهم، فبصراحة التحضير كان سهل ”.
هل تعتمد على ريفيرانس عندما تحضر أدوارك أم تترك السيناريو يوجهك ؟
"ساعات كدة وساعات كدة على حسب حجم الدور وتأثيره في الأحداث، يعني مثلا أول مرة أمثل في حياتي كان فيلم الفيل الأزرق 2 ودوري كان صغير فأنا كل اللي كنت محتاج أتعلمه إزاي أقف على البار والحركة بتاعته بتبقى إزاي والحركة بين الأزايز إزاي فا أنا ساعتها أخدت ريفيرانس واضح وصريح من واحد كنت بشوفه في أماكن كنت واخده ريفيرانس بلبسه وشكله وكل حاجة، وفيه حاجات تانية ببقى محتاج أذاكرلها كويس .
أكثر دور كانت تحضيراته صعبة بالنسبة لك على مدار الأدوار التي قدمتها ؟
دوري في مسلسل " دوبامين " لإن الشخصية كانت مركبة جدا وكانت بتمر طول القصة بين حب وزعل وحزن وعياط وجنون، وكان فيه كم مشاعر كبير جدا، فا دي أكتر شخصية تعبتني جدا لإنه كان دور مهم أوى في المسلسل لإنه كان فيه حفظ كتير وكان محتاج تمرين على حاجات كتير جدا خصوصا مشاهد العياط لإن فيه ناس عندها الموضوع ده سهل أنا بالنسبالي كان محتاج شوية تدريب وأخدت ورشة بسيطة علشان أعمله .
هل تتعمد إظهار جانب كوميدي في كل أدوارك أم على حسب السيناريو ؟
هو بيبقى على حسب السيناريو وكمان على حسب طلب المخرج، يعني لما جيت عملت مسلسل " عيشها بفرحة " أنا حقيقي مكنتش أعرف إن الدور هيبقى كوميدي، ولكن المخرج وأستاذ عمرو محمود ياسين الاتنين طلبوا مني نحط الشخصية في الحتة الكوميدي، فمجرد إنهم طلبوا مني ده فبقينا متعاونين في القصة دي، وبعدين أستاذ ألبير المخرج خطير في موضوع الإفيهات، وأنا شخصيا بحاول أبعد عن الكوميدي وبحاول أعمل أدوار جادة بقدر الإمكان .
هل السينما المصرية في حاجة لتقديم عمل الأن عن القضية الفلسطينية في ظل الأحداث المأساوية بفلسطين الفترة الأخيرة ؟
طبعا وياريت ده يحصل لإن احنا مثلا هتلاقي من الحاجات اللي الشعب بيحبها وبيحب يتفرج عليها مسلسل " الاختيار " لإنه مسلسل بيتناول قضايا وليه علاقة بالحرب وبالظروف اللي احنا عايشين فيها، الناس بتتعاطف معاها وبتحركها وبالعكس ده ممكن يشجع الناس إنها تعمل أكتر وتتحرك أكتر، واحنا محتاجين نعمل أفلام أكتر لإن احنا لدينا القيادة في المجال بتاع السينما والدراما، وعلشان كمان احنا بنسجل التاريخ، لإن التاريخ ده ممكن يتغير في أي لحظة يعني الدول العظمى ممكن جدا يمسحوا تاريخ فلسطين كله، فا إحنا عايزين نبقى بنأرخ لده .
هناك من يرى أن السينما المصرية لم تطرح القضية الفلسطينية بشكل عميق.. ما تعليقك؟
فعلا لسه متكلمناش بشكل متعمق اللي هو تبقى قصة من جوة فلسطين يعني مثلا نشوف أسرة فلسطينية واللي بيحصلها لسه السينما المصرية معملتهاش بشكل صريح، أعتقد إن الوقت جاي وأعتقد إن فيه كتير عايزين يعملوا كدة .
هل تتوقع أن شركات الإنتاج تتجه لإنتاج أفلام عن القضية الفلسطينية ؟
اه طبعا ممكن يحصل ونلاقي أفلام عن القضية الفلسطينية وتسلط الضوء عليها .
هل توافق على تقديم دور في عمل فني عن القضية الفلسطينية ؟
اه طبعا أوافق وهشارك بدون أجر كمان، يعني أنا أحب إني أكون جزء من عمل هدفه يوثق القضية الفلسطينية ويخلي الناس تتفرج وتشوف وتفهم الحقيقة اللي بتحصل هناك .
ما رأيك في موقف محمد سلام باعتذاره عن موسم الرياض ؟
رأيي إنه موقف شجاع جدا مش أي حد يعرف يعملها خصوصا في الظروف إن احنا بنحاول ندور على أكل العيش ونكسب فلوس وكلنا عندنا مشاكلنا، فكون إنه ضحى بكل ده.. ده شجاعة كبيرة منه، لإن محمد سلام شخص حساس جدا وعمل ده من قلبه مش قاصد إنه يعمل ده على سبيل إنه يضايق حد أو على سبيل الفرقعة والتريند، ومعرفتي الشخصية بيه ميطلعش منه حاجة لمجرد التريند .
ما رأيك في الانتقادات الموجهة للمملكة العربية السعودية ونجوم الفن الذين حضروا فعاليات موسم الرياض في ظل الأحداث الأخيرة بفلسطين ؟
أنا بصراحة مستغرب شوية لإن المفروض الدول العربية كلها يبقى عندها نفس الموقف، ولكن كل شعب غير التاني وكل شعب ليه اهتماماته، ومصر طول عمرها متصدرة في الحاجات دي، ومهتمة يكون ليها دور في المساندة، والمملكة العربية السعودية طول عمرها مكانتش متصدرة زي مصر .
ما رأيك في الانتقادات التى وجهت لـ محمد صلاح بأنه تأخر في الحديث عن القضية الفلسطينية ؟
هو فيه شقين للموضوع، أولا محمد صلاح لعيب كرة يعني هو مش سياسي، والشق التاني إن الراجل ده له تأثير ولكن هو عايش في إنجلترا بمعنى إنه عايش في بلد مش بلده وهي دي البلد اللي حقق فيها نجاح، والبلد دي أصلا ضد القضية الفلسطينية، فا كلام محمد صلاح ممكن يعرضه لمخاطرة، وهو ممكن يكون اتأخر في الرد علشان يلاقي طريقة مناسبة بحيث كلامه يكون موزون، وعلى الفكرة الكلام الموزون في الأوقات اللي زي دي بيبقى صعب جدا، وبصراحة شديدة جدا مكنتش مستنيه يعمل حاجة يعني
هل هناك مشاريع قادمة لك في الفترة القادمة ؟
إن شاء الله قريب جدا يعني يمكن على شهر 12 فيه فيلم جديد اسمه " دراكو رع" وهو فيلم كوميدي خفيف جدا والفيلم إخراج كريم أبو زيد ويعتبر نوعية جديدة وهي الرعب الكوميدي، وفيه مسلسل " روز وليلى " كان المفروض ينزل في أول السنة واحتمال ينزل الشهر الجاي .
