خبير تكنولوجي: انقطاع الانترنت شائعة متكررة خمس مرات.. ومحدش هيشيل الفيشة عن العالم
ناقشت الاعلامية سارة نخلة خلال برنامجها فيس أوف على شاشة قناة هي تداول أخبار عن انقطاع الإنترنت على العالم بشكل كامل يوم ١١ أكتوبر ٢٠٢٣ وذلك بعد تحذيرات وكالة ناسا من عاصفة شمسية محتملة.
وقال المهندس روماني رزق الله استشاري التحول الرقمي والذكاء الاصطناعي خلال مداخلة هاتفية مع برنامج فيس أوف على قناة "هي": الشائعة دي اتكررت خلال العشر سنوات اللي فاتت خمس مرات ودا اتقال المرادي لأنه وكالة ناسا عملت دراسة عن تأثير العواصف الشمسية على انقطاع الانترنت ولكن الخبر تم تهويله وتكبيره".
وأضاف: الانترنت لو انقطع الحياة هترجع لما قبل القرن الماضي لأن الكهرباء بتاعة العواصم والمستشفيات والطائرات والذكاء الاصطناعي مرتبطين بالانترنت ومفيش حد هيشيل الفيشة عن الانترنت في العالم مفيش حد مسؤول عن دا، دي مجموعة من الشركات اللي بتستثمر في الكابلات البحرية.
وأوضح عن سبب تكرار هذه الشائعة: "الاشاعة دي اعتقد انها بالونات اختبار واحنا شوفنا مسلسل بيتكلم عن انقطاع الكهرباء عن العالم وشوفنا عرافة لبنانية شهيرة بتقول حاجات حصل منها كتير على مستوى العالم بس قالت ان الانقطاع هيكون جزئي مش كلي ودا ممكن يحصل لمدة ساعتين في حتة معينة ولكن مش على العالم كله".
برنامج "FACE OFF" تقدمه الإعلامية سارة نخلة على شاشة قناة هي يوميًا من السبت إلى الأثنين وتستضيف من خلاله عددا من نجوم الفن وتناقش القضايا المطروحة يوميًا بين الجمهور.
