الخميس 30 نوفمبر 2023 الموافق 16 جمادى الأولى 1445
رئيس التحرير
حازم عادل
فن وثقافة

"بيقولوا أني شبه جورجينا بس العرب بيحبوا الأجانب".. أبرز تصريحات ياسمين صبري مع عمرو أديب

الإثنين 25/سبتمبر/2023 - 09:33 ص
ياسمين صبري
ياسمين صبري

ياسمين صبري .. حلت الفنانة ياسمين صبري اليوم ضيفة ببرنامج الحكاية مع عمرو اديب و تحدثت في الكثير من الأمور المتعلقة بحياتها الشخصية و أعمالها الفنية.


قالت ياسمين عدة تصريحات أهمها " لو مكنتش ممثلة كنت عايزة ابقى محامية أو سيدة أعمال علشان بالي طويل و عندي صبر  ".  

 

"بيقولوا أني شبه جورجينا بس العرب بيحبوا الأجانب".. أبرز تصريحات ياسمين صبري مع عمرو أديب 

 

تابعت " بحب السفر و شغلي كله سفر ، و السفر بيخليك تحتك بالناس اكتر و تكون شخص مرن، بشتغل على نفسي كل يوم ، و بتفرج على سيشن في علم النفس " .

 

قالت " الإنسان لازم يعمل القيمة، و إن القيمة انك تستخدم عقلك تتطور و تفكر و ترتقي بنفسك ، و القيمة مش بكونك إن فلان " .

 

تابعت " الست بتحب كل حاجة حلوة ، و اكتر مبيعات في العالم بتكون المنتجات النسائية، لما تكون معايا صديقتي و زوجها جيه ، بسيبها و بمشي ، بخلي الست مرتاحة الا لما تكون مصممة اني اكون موجودة ".

 

و قالت:" إن البني ادم عبارة عن براند ماشي على الأرض، إن أي حد تحت الأضواء لازم يتعب و يشتغل على نفسه و يسعى " .

 

و قالت " الطيارات بتكون مجرد عقود سواء يوافقوا عليها أو ميوافقوش ، و إن الطيارة مبتعملش انسان، و إن الإنسان لازم يكون تقيل و رزين و قوي ، و أن ربنا ميزنا عن كل الكائنات بالعقل ".

 

و أضافت " الناس مشكلتها أنهم بيهملوا نفسهم و بيشتكوا من سوء حال الدنيا و سوء الحظ ، و بؤمن إن في ايدك تخلي حياتك جنة أو نار، بحب القراءة جدا، و طموحة جدا و ده ساعدني على التطور ".

 

ياسمين صبري .. و تابعت " دور الضحية بيحب الاستعطاف و يعيش الدور ده ، و من صغري طموحة و محظوظة، الحلاوة ممكن تساعد الحظ ، و ممكن تضيعها إذا أساءت استخدامها " .

 

و قالت " طول عمري بلعب رياضة و أنا 4 سنين ، كنت سباحة من صغري و كنت بدخل بطولات ، و سيبت السباحة و أنا عندي 18 سنة ، و كملت رياضة بعدها " .

 

و أضافت " اتعلمت حركة البرجل على كبر ، و إنها تعتبر تمارين يوجا، بلعب ساعة و نص كارديو ، و 70 دقيقة يوجا "

ياسمين صبري

و قالت " اكتر ناس محتاجين اليوجا اللي عندهم ضغوطات في الحياة، الراجل لو حب شكل ياسمين ، ف هو حب جزء من شخصية ياسمين ، و كل ست جواها مؤشر و بتبقى عارفة إذا كان الراجل صادق أو كذاب ".

 

ياسمين صبري .. و قالت " مش كل الناس تقدر تيجي تكلمني، أنا شخصية محافظة و أفتخر و اللي خلاني كدة تربية جدتي ".

و تابعت " الانتقام ده تضييع وقت ، و إنه معناه أن أنا مهتمة، معنديش أعداء ، و في نفس الوقت معنديش صداقات كتير " .

 

وأضافت " صعب يكون عندي صديق راجل لإن بيحصل تكوين مشاعر مع الوقت، أنا جاية من بيئة فيها قيود ، و مش حاسة ان فايتني حاجة "

 

تابعت " الشهرة بتقيدني إني مثلا أروح بحري أكل سمك، أنا بنت الاسكندرانية ، و إن الناس على السواحل أعصابهم أهدى عن الناس اللي عايشة في القاهرة، كيم كارداشيان هي ست عرفت تستغل مشاكلها صح " .

ياسمين صبري

ياسمين صبري.. تابعت " بيقولوا إني شبه جورجينا علشان نفس ألوانها ، عندنا مشكلة كعرب و هي أننا بنمجد الشئ الأجنبي و العربي بيبقى رقم اتنين ، و دي ثقافة موجودة "

 

أضافت " أنا من الناس لو غيرت حاجة في نفسي هتبقى أوحش، قالوا في بداياتي إني بقلد كيم كارداشيان كيم ليها أخت أصغر و بتكون أقوى منها "  .


يذكر أن الفنانة ياسمين صبري قدمت فيلم البعبع الذي عرض في موسم الصيف ، و يشارك في بطولة الفيلم أمير كرارة و باسم سمرة و محمد عبد الرحمن و محمد أنور ، و يعد الفيلم من تأليف ايهاب بليبل ، و من اخراج حسين المنباوي

 

كما من المفترض أن يعرض لياسمين صبري فيلم ابو نسب في ديسمبر المقبل و يشارك في بطولة الفيلم كل من محمد امام و ماجد الكدواني ، و يعد الفيلم من تأليف أيمن وتار ، و من اخراج رامي إمام .