أبويا مديون علشان يصرف عليا.. لاعب منتخب مصر للمصارعة يكشف سبب هروبه خارج البلاد

كشف سيف شكرى ، لاعب المصارعة الهـارب من منتخب مصر للمصارعة ، أسباب تركه المنتخب فى ترانزيت دبى والسفر لبولندا قائلا "وزير الشباب والرياضة معرفش اسمى غير لما سبت المنتخب "

وتابع سيف شكرى ،" أبويا كان مديون علشان يصرف عليا وعلى تدريبى وعلى الجزم بتاعتى .. وجزمى كلها اتقطعت ومش عارف أجيب غيرها وكنت بلزقها".

وقال سيف شكرى ،"الإعلام بيستضيف ناس "تافهة" بالساعات وأنا مافيش حتى راديو اتكلم عنى ، وكنت باخد 745 جنيه فى الشهر ومكافأة بطولة أفريقيا 5 آلاف جنيه ".

وكان سيف شكرى ، بطل منتخب مصر للمصارعة والذى ترك المنتخب فى الترانزيت بدبى ، قد دافع عن ما قام به وعلق وقال " السلام عليكم .. انا أحب أشكر كل من دعمني أولا أحبكم جميعا في الله ..ثانيا أنا عملت كدا لظروف خاصة.. ملخصها إني بحلم حلم من صغري "الذهب الأولمبي" ومش عارف أحققكو لحد اللحظة ديه .. حاولت كتيير وأنجزت كتير ولسا زي منا ماديا ومعنويا .. وأول ذهبية ليا في بطولة الجمهورية كنت 12 سنة وكان ذراعي مشروخ "شبه مكسور" .. وبطل افريقيا من سن ١٨ سنة بفضل الله".

وتابع "أحب أوجه رسالة لوزارة الشباب والرياضة والإتحاد المصري للمصارعة  زمايلي في المنتخب اللي زيي واللي أحسن مني ابطال عالم واولمبياد الحقوهم وساعدوهم انهم ينجزو اكتر وحققو مطالبهم  .. وأكتفي بهذا القدر الآن .. وسأظهر في فيديو قريبا أوضح فيه كل شيء".