كولر يتمسك بضم إمام عاشور ويطالب الأهلي بحسم الصفقة
تحدث الإعلامي أمير هشام عن الهتافات التي أطلقتها بعض جماهير النادي الأهلي في مباراة فيوتشر التي أقيمت بملعب "السلام"، ضمن منافسات الدوري المصري والتي انتهت بالتعادل السلبي، وذلك الأنباء التي ترددت حول دخول الأهلي في مفاوضات لضم إمام عاشور لاعب منتخب مصر ونادي ميتلاند الدنماركي، مؤكداً في الوقت ذاته على تمسك السويسري مارسيل كولر، المدير الفني للفريق الكروي الأول بالنادي الأهلي بضم اللاعب.
كولر يتمسك بضم إمام عاشور ويطالب الأهلي بحسم الصفقة
وقال أمير هشام عبر برنامجه "بلس 90"، "الجمهور جمهور و هو درع وسيف النادي الأهلي وهو عنصر رقم واحد في المنظومة ولكن الإدارة للإدارة، وبالتأكيد النادي الأهلي مش هيلف على واحد واحد عشان ياخد القرار طالما هناك إدارة محترمة ومحترفة وفي ثقة كبيرة جدا فيها من الجمهور والجمعية العمومية بعد إنجازات كبيرة حققتها".
وأضاف أمير هشام، "التمسك بالشعارات حاجة جميلة لكن أهم حاجة متخليش الشعارات دي سيف على رقبتك في بعض الأحيان ممكن الجمهور أو النادي يحطها سيف على رقبته بمعنى يكون النادي مصلحته حاجة أو من الأفضل أنه يعملها ومع تمسكه ببعض الشعارات ممكن يعطل أو يكون ضد مصلحة النادي الأهلي، في ناس بتحاول تستغل الشعارات عشان تدبحك بيها أو تأثر عليك بيها".
واستكمل أمير هشام، "إبراهيم سعيد لما سافر بطريقة غير شرعية وراح على نادي جنت البلجيكي وبعد كده حصل تواصل مع النادي الأهلي عشان يرجع النادي ورجع إبراهيم سعيد واعتذر ، كان صالح سليم رافض التجديد للاعب ولكن مجلس الإدارة وقتها كان موافق وكان شايف أن من مصلحة الفريق وجود اللاعب، وده كان قرار مجلس الإدارة بالموافقة بالإجماع ورضخ صالح سليم لقرار الأغلبية" .
وتابع أمير هشام، إمام عاشور ارتكب تصرف ما واعتذر و كلنا بنغلط وبنعتذر احنا بشر كل الحاجات اللي زي دي وارد أنها تحصل ولازم ندركها ، كولر عايز إمام عاشور ومعجب بأداء اللاعب وشايف أنه مميز للغاية واللي أنا أفهمه لما المدير الفني يطلب لاعب مجلس الإدارة أيا كان مين اللي موجود بيسعى بمنتهى القوة لتلبية طلب المدير الفني، ومن المتوقع خلال الأيام القادمة حسم صفقة إمام عاشور وإعلانه لاعب بشكل رسمي في النادي الأهلي بناءا على قرار كولر" .
أمير هشام يفتح النار على ميدو: "أنت بالليل حاجة والصبح لما بتفوق حاجة تانية"
شن الإعلامي أمير هشام هجوماً عنيفاً على أحمد حسام ميدو، نجم نادي الزمالك الأسبق، بعدما أعلن الأخير تقديم شكوى ضد أمير هشام بعدما تحدث عن توقيع أحمد فتوح لاعب الفريق الكروي الأول بنادي الزمالك للنادي الأهلي.
وقال أمير هشام عبر برنامجه "بلس 90"، "أنت بالليل حاجة و الصبح لما بتفوق حاجة تانية، أنت شغلتك على المدفع ايه؟ أنا ولا بخاف ولا بتهز، أحمد حسام ميدو لمح في برنامجه في قناة عامة محايدة طلع من خلال برنامجه وهاجمنا بشكل كبير ومن خلال حسابه على تويتر بشكل واضح ، أنا عايز أسألك سؤال شغلتك على المدفع ايه ؟، أكلمك كأيه كإعلامي ولا كمسؤول ولا كمتحدث بأسم نادي الزمالك ؟".
وأضاف أمير هشام، "لو كإعلامي هسألك سؤال هو إلياس الجلاصي اللي في المصري اللاعب الجامد الزمالك تفاوض معاه ولا لا واللاعب نفسه أعلن في إحدى البرامج أن مدحت عبدالهادي كلمه، مع أن عقده كان لسه ممتد مع المصري حصل ولا محصلش ؟ حصل وهسألك بقى كمسؤول لما ده حصل أنت فين من الكلام ده ؟ ، حد قدم شكوى في مسؤولي الزمالك وقتها؟ لا أحمد حسام ميدو كإعلامي طلع وقال الشناوي عنده عرض من أهلي جده هو الشناوي عقده خلص مع الأهلي المصري ؟ لا لسه عقده ممتد، هل هنلوم أحمد حسام ميدو عشان قال معلومة ؟ راجل بيقوم بشغله وبيحاول يجتهد ويقدم معلومة".
وتابع أمير هشام، "ليه لما قولنا معلومة في برنامجنا قمت بتقديم شكوى، أحمد حسام ميدو كان مدير فني في الإسماعيلي وهو مقدم برنامج منحاز للزمالك، في ازدواجية واضحة وتضارب مصالح في بعض الأمور، كإعلاميين لازم نبقى مسؤولين عن الأخبار اللي بنقولها ، لكن أحمد حسام ميدو في أخبار كتير جدا من خلاله بتتقال غلط وبالدليل والفيديوهات، مع الوضع في الاعتبار أنا مش هزعل من ميدو لسبب بسيط أنا مدرك جدا أن التوقيت اللي قال فيه كلامه عننا والتويته اللي ليها علاقة بينا كان بالليل وأنا عارف أن ميدو بالليل حاجة والصبح حاجة ، وأنا واثق أنه بيلوم نفسه بس لما فاق الصبح تاني يوم، لأن مهنيا متقدرش تقول عليا حاجة بقوم بشغلي كإعلامي اللي أنا درسته" .
واصل أمير هشام تصريحاته قائلاً، "خالد الغندور كان ضيف في برنامجنا ولمح لمشاكل كتير داخل النادي وظهوره معانا كان سبب في رجوعه لقناة الزمالك وبنفسه أشاد بمقدم البرنامج وأشاد بفريق العمل جدا أخر الحلقة ، خالد الغندور عنده برنامجين في الإذاعة وقنوات محايدة وفي نفس الوقت شغال في قناة نادي الزمالك دلوقتي بيهاجم البرنامج وبيقول أنه واخد توجه لأني أهلاوي وكنت في قناة الأهلي... البرنامج ده اللي عمل سبق في أخبار كتير تبسط نادي الزمالك قبل ما أنتو تعلنوا عنها لأن بمهتن وظيفتي وبسيب انتمائي على باب الاستديو أنا مهني ودرست المهنة وخريج إعلام".
واستكمل، "اتهامات موجهة ليا أني واخد توجه ضد الزمالك وعايز أهز استقرار النادي مع أن أنا قولت على فتوح أنه أفضل ظهير أيسر ودافعت عنه وأشدت باللاعب وقت كان النادي نفسه بيهاجم اللاعب، ودافعت عن أحمد الأحمر لما مسؤولي الزمالك هاجموه، وكنا أصحاب أخبار سارة لجماهير الزمالك وأعلنا عن تسوية المديونية ووضحنا بالتفاصيل".
