جرعة بنج زائدة.. طبيب يتسبب في دخول طفل بغيبوبة بمستشفي شهيرة

تداول على موقع التواصل الإجتماعي "فيس بوك"، منشور يتضمن دخول طفل في غيبوبة لعدة أيام، وذلك بسبب خطأ طبي.

جرعة بنج زائدة.. طبيب يتسبب في دخول طفل بغيبوبة بمستشفي شهيرة 

وكتبت "مروة" شقيقة الطفل طارق في منشورها:"أخويا حبيبي عنده11 سنة في الصف الرابع الإبتدائي وقع علي أيديه يوم  18-4  قبل العيد بيومين وماما أخدته إلي أقرب مستشفى اليوم الواحد عشان تكشف عليه وبعد كشف دكتور العظام قال إنه مصاب بكسر بين كف الإيد والدراع وعملوا جبس وقالها تعالي بعد أسبوع  الإستشارة".

وتابعت:"راحت ماما يوم  26-4 الإستشارة والدكتور قالها أنه محتاج عمليه عشان الجبس ملمش  فقال لماما أنه هيدخل يعمل عمليه أسمها مشبك عشان تمسك الايد.. وفي نفس الدقيقة كان بينادي على التمريض عشان ياخدوا أخويا يحضروه للعملية وكان مستعجل جدًا عنده مشوار .. وماما كانت مستغربة أنه أزاى هيدخل عمليه قبل ما يعملوا التحاليل ومن غير ما يكون صايم حتي عشان البنج واستخف الدكتور المحترم بعقل أمي وقالها أنها عملية بسيطة والتحاليل هيعملوها جوا".

واستكملت:" تم تحضير أخويا قبل العملية على أيد ممرضة أخدت طارق أخويا لدكتور تخدير بعدها بـ 7 دقايق بس ولله لقينا المستشفى كلها اتقلبت وكل الدكاترة بقيت تنادي على بعض والتمريض كله بيجري معرفش بيروح فين بسبب أنه أخويا حصله تشنجات وجسمه كله ازرق ومبقاش في نفس خالص.. وفضل في الرعاية محطوط على أجهزة".

وأضافت:" من يوم الأربع الساعه 2م لحد يوم السبت الساعة ٧ص كان في مستشفي اليوم الواحد وكان دكتور روماني مدير المستشفي كل شويه يجي يطمنا ويقولنا خلال 48 ساعة هيفوق ودي حاجة بسيطة ومتقلقوش وكان بيخلي ماما وخالتو يدخلوا يشوفه كل شويه عشان يطمنه عليه.. ومن يوم 29-4  لحد انهارده هو في غيبوبه في مستشفي الهرم بعد مانقوله عشان معندهمش رعاية كويسة قال".

واختتمت:" تقرير الحالة من مستشفي الهرم بيقول أنه حصل توقف لـ عضله القلب عده مرات متتالية مما أدى لنقص الأكسجين في المخ  وتسبب في غيبوبه وهما ميعرفوش هو هيفوق امتى وكمان ميعرفوش الأثر اللي تسبب فيه نقص الأكسجين هل هو شلل للجسم بالكامل أو ضمور في العضلات والمخ" .