أحمد عبد الحميد في حوار لـ"مصر تايمز" بعد تألقه في تحت الوصاية: الناس تعاطفت مع "شنهابي".. الصياد بيتعب جدا وكنا بنصتاد حقيقي.. منى زكي إنسانة عظيمة وبتخلص للشغل.. وأعجبت بدور "عم ربيع"
خطف الفنان الشاب أحمد عبد الحميد الأنظار إليه من خلال دور “شنهابي” في المسلسل الرمضاني “تحت الوصاية” بطولة الفنانة منى زكي، حيث حصد إشادات كثيرة من الجمهور بسبب إتقانه للدور حتى ظن الجميع إنه بحار حقيقي.
وأجرى “مصر تايمز” حوارا مع الفنان أحمد عبد الحميد، الذي تساءل الجمهور عنه، ليكشف عن كواليس عمل “تحت الوصاية”، وتعاونه مع الفنانة منى زكي ونحضيراته لدور “شنهابي".. وإلى نص الحوار
في البداية.. حدثنا عن شخصية “شنهابي” بمسلسل “تحت الوصاية”
هي شخصية تعاطفت معاها الناس في الاخر بالرغم من إنه بيسرق ولكن ملهوش ملامح متعرفيش هو عنده ضمير ولا معندوش وده أصعب والحمدلله قدرت أول للناس المطلوب من شخصية “شنهابي”
هل كان هناك مشاهد صعبة خلال التصوير؟
كان معانا ناس خبيرة على المركب بتساعدنا علشان كده مكنش في مواقف صعبة اوي الناس اللي ورا الكاميرا تعبت اكتر مننا علشن يظبطوا الشغل ويبان طبيعي
ماذا عن كواليس العمل خلال صيد السمك والجمبري؟
كنا بنصتاد بجد ودي كانت أحلى حاجة بالنسبالي احنا بنختبر حياة الصياد الحقيقي اللي بيشقى ويتعب ويستنى ربنا يبعتله رزقه وفي الاخر احنا ندخل مطعم سمك وناكل على الجاهز ولكن الصياد بيتعب
كيف كان يتم تصوير مشهد صيد الجمبري؟
كنا بنطلع الصبح أول اليوم نصور مشهد نرمي فيه شبك ونكمل باقي تصوير اليوم وبعدها نرجع نصور مشهد لم الشبك ونشوف ربنا بعتلنا ايه
ما رأيك في الانتقادات التي طالت المسلسل قبل عرضه؟
مكنتش شايف انتقادات لاننا كما بنصور وعندنا اهتمام أكتر نركز في شغلنا ونلحق موسم رمضان وأنا بالنسبالي الكلام على أي حاجة بالسلب او بالإيجاب بيجذب الانتباه لها وده شئ ينجحنا طبعا
كيف رأيت ردود الأفعال على المسلسل؟
المسلسل أول مانزل نجح ومكنش عليه أي نقد سلبي واحد أول ماتعرض ودي حاجة كبيرة بالنسبالي
ما الذي تعلمته من الفنانة منى زكي؟
ازاي أكون صادق جدا ومخلص لشغلي وازاي بطلع طاقة إيجابية لزملائي في الشغل وإزاي أكون نجم في يوم من الأيام هي إنسانة عظيمة وأنا اتبسطت جدا بالشغل معها ومش بتبخل بأي مجهود أو مشاعر في الشغل
ما أكثر شخصية أعجبت بها في العمل؟
كل واحد في المسلسل بذل مجهود كبير والمخرج القدير محمد شاكر خضير وظف كل واحد في دوره اللي يستحقه وأنا عجبني جدا دور عم ربيع ودور صالح وكل واحد في المسلسل عمل مجهود كبير.
ماذا عن أعمالك المقبلة؟
مفيش حاجة حاليا تعاقدت عليها ولكن ربنا يكرم في اللي الجاي بإذن الله.
