عصام السقا يتحدث عن شخصية "نعيم" في حوار لـ "مصر تايمز": محمد رمضان جدع وابن بلد.. "المداح" كله بيخوف وتعبنا جامد في الجزء الثالث.. يحيى وكنوز أقوى من العام الماضي.. مسلسل "الاختيار" له بقلبي مكانه
استطاع أن يجذب الأنظار منذ ظهوره في الأعمال الدرامية والسينمائية، حيث بدأ مشواره الفني عام 2009 في مسلسل "لحظات حرجة" مع المخرج أحمد صالح، وقدم "ضل راجل"، و"كلبش"، و"كوفيد 25"، ويشارك حاليا مع أهم النجوم في مسلسل جعفر العمدة بطولة النجم محمد رمضان بشخصية "نعيم" وهو الرجل الأول والقريب من جعفر العمدة، كما يشارك في مسلسل المداح 3 بطولة الفنان حمادة هلال، بشخصية "عصام"، هو الفنان عصام السقا.
حرص "مصر تايمز" على إجراء حوار مع الفنان عصام السقا، ليكشف عن التحضيرات التي قام بها استعدادا للشخصيات التي يقدمها في رمضان 2023، وانطباعه الأول عن تعاونه مع النجم محمد رمضان ، والمخرج محمد سامي، كما تحدث عن كواليس المداح3، ونجاح الجزء الثاني من يحيى وكنوز.
في البداية.. حدثنا عن أعمالك في شهر رمضان 2023؟
الحمدلله رمضان دا مشارك في أكثر من عمل وكلهم خدو جهد ووقت ومذاكره سواء كان المداح أو العمدة ان شاء الله ربنا يرزقنا النجاح والقبول ان شاءالله يارب.. وفي يحيى وكنوز كمان اللي قريب جدا من قلبي وان شاء الله الجزء التاني يعجب الناس زي الأول ونكون جزء من رمضان كل سنة.
ما هي الشخصية الأقرب لقلبك؟
بصراحة كل شخصيه من الشخصيات اللى عملتها بتاخد مني حته وبتضيف ليا حته كلهم بياخدو مني وقت وجهد ودراسه وبحس إني بتأثر بيهم فكل الشخصيات اللى عملتها حاسسهم ولادي أو عيلتي كلهم قريبين ليا أوي بس مسلسل الاختيار له في قلبي مكانه خاصة لأنه عمل آثر فينا كلنا عشان قربنا من الشهداء الأبرار اللي مثلنا شخصياتهم للناس ووريناهم معانتهم الله يرحمهم.
ماذا يمثل لك المخرج محمد سامى ؟
محمد صديق وأخ وفنان ومبدع عالصعيد الشخصي رجوله وجدع وبصراحه عزيز أوي أوي على قلبي وعنده طيبه قلب وقبول أوي بتعلم منه وبيآثر في كل اللى حواليا واهتمامه بشغله يخليك عايز تطلع أحسن حاجه عندك.
حدثنا عن كواليس مسلسل العمدة والأجواء التى يفرضها محمد رمضان على فريق العمل؟
من أحسن كواليس المسلسلات اللى اشتغلت فيها الصراحه وأحاسيس جميلة وأخويه بينا كلنا محمد رمضان إنسان بسيط وبيحب اللى معاه وبيعمل ألفه بينا وبينه كلنا وبيهتم بكل اللى في اللوكيشن كنا أسره واحده يعني مش زملاء عمل فقط.
عندما قرأت ورق مسلسل العمدة هل ترددت أم وافقت على طول؟
بصراحه بحب أخد وقتي في أي ورق يجيلي وبفكر كذا مره عشان أعرف الدور هيطلع مني زي ما أنا عايز وهيضيف ليا ولا لا أما جالي الورق كان لازم إما أرد وأوافق أكون عارف إني هكون قد حسن ظن المؤلف والمخرج والجمهور الأهم .
هل تلك التجربة الأولى لك مع محمد رمضان ؟ وما انطباعك عنه بعد التعامل معه بشكل مباشر؟
محمد رمضان أول عمل معاه وأول مقابله معاه بتحس إنك شوفته واتعاملت معاه قبل كدا من زمان وإنك عارفه بقالك كتير وهو جدع وابن بلد أوي وإحنا أصدقاء جدا بعيد عن العمل يعني وطالما في موده بين الزملاء وبيحبو بعض يطعلو أحسن مافيهم.
ما المميزات التي يتميز محمد سامى بها عن باقى المخرجين ؟
محمد مخرج سلس وعنده درايه ووعي بكل تفاصيل الشغل بيعلم اللى حواليه ويتعلم منهم وكمان مثقف جدًا.. الشغل معاه ممتع ودا مش أول تعاون بينا وان شاءالله مش الأخير.
خلينا ننتقل لمسلسل المداح 3 وكواليسه؟ ومين رشحك للعمل به ؟ وازاى استعديت للشخصية؟
حمادة هلال حبيبي جدا وبجد اتبسطت أوي إني قدرت أكون جزء من العمل الجميل اللى نجح جدا قبل كدا ودخل قلوب الناس وبصراحه كانت أوقات جميله.. الشغل مهما كان مجهد بس طالما حواليك طقم عمل كويس وقريب ليك بيهون كتير والشخصية احتاجت مذاكرة كبيرة بس إن شاءالله الواحد هيلاقي على قد تعبه وتوفيق ربنا كان ملازمني الصراحه في كل المذاكرة للشخصية ودراستها وتأديتها كمان كفايه إني وقفت قدام ناس عتاوله فالمسلسل زي الأستاذ عبدالعزيز مخيون وخالد ذكي وأحمد ماهر وكلهم بصراحه مش عايز انسى حد .
بعد النجاح الكبير للمداح 1 و 2.. ايه أكتر حاجة خايف منها في مسلسل المداح 3 ؟
المسلسل كله هيخوف الصراحه بس ان شاءالله متأكد أنه هيعجب الناس وأنه هيكون مختلف جداً عن الأجزاء اللى فاتت لأن العمل متعوب فيه أوي الصراحه وان شاء الله مجهود كل طقم العمل ربنا هيكلله بالنجاح الكبير.
يحيى وكنوز مختلف عن السنة الماضية هل الحلقات ستكون أقوى؟.. وما الفرق بين الموسم الماضى والحالى ؟
الموسم دا من يحيى وكنوز أقوى عشان معانا بعد ربنا سبحانه وتعالى حب الناس ونجاحنا في الموسم الماضي.. وبصراحه كل ما تنجح أكتر كل ما الأمور تتصعب أكتر لأنك لازم توصل لأعلى من السقف اللى أنت وصلتله وإن شاءالله الموسم الثانى من يحيى وكنوز يكسر الدنيا ويفضل أنجح وأنجح.
هل عصام السقا لديه الكثير لم يقدمه في الدراما المصرية؟
طبعا طول ما الواحد فيه نفس لازم يعافر ولازم يكبر نفسه ولازم يفضل يدي عشان يآمن بأنه لسه عنده كتير أوي أوي هيقدمه وإن مهما قدم ف أكيد لسه في حاجات يقدر يعملها ويأديها لأن الطموح ملوش سقف لأي إنسان ناجح وبيحلم
ما هي طموحاتك في الوسط الفنى؟
طموحاتي عموما أن ربنا يرزقني التوفيق وحب الناس وحب زمايلي فالوسط الفني وإني اقدر اترك بصمه حلوة في أذهان الناس وسيره حلوة فوسط الصحاب والزمايل .
