فلوسي اترمت فى الأرض.. مواطن يوثق تجربته السيئة مع خدمة عملاء شركة العربي
وثق مواطن تجربته مع خدمة عملاء شركة العربي التى وصفها بإنها سيئة ، وأن أمواله ضاعت على الأرض ، على حد قوله.
وقال صاحب المشكلة مع شركة العربي،" انا عندي مشكلة مع شركة العربي في 2018 جيبت ثلاجة شارب S1-48C والمعروف ان التلاجات ضمانها 10 سنين. المهم التلاجة اتسابت في البيت لمدة حوالي شهر والمفروض انها كانت شغاله ، رجعنا من السفر لاقينا الحاجة اللي في التلاجة كلها باظت والتلاجة مش بتبرد خالص ولا في الفريزر ولا في الكابينة بتاعت التلاجة! ".
وتابع عن مشكلته مع شركة العربي ،" مشكلتي مش في الحاجة اللي باظت ولا تكلفتها ايه في ظل غلاء الاسعار ربنا يعوض علينا ، مشكلتي دلوقتي اني كلمت خدمة العملاء الاسبوع اللي فات جه بعدها بيومين تلاتة فني عشان يصلح التلاجة. قالي ان العطل اللي فيها ( جنزرة خضراء ) وقالي ان التلاجة هتحتاج تغير كابينة كاملة لإن لما بيبقى في جنزرة خضراء بيغيروا الكابينة كلها و هتتكلف حوالي 3000 جنيه وهتبقى خارج الضمان لإن ده سوء استخدام! قولتله لأ طبعاً مدفعش 3000 تصليح للتلاجة وهى داخل الضمان والموضوع كده مش مناسبني قالي انا هكتب في التقرير غير جاهز للتكلفة قولتله مش قصة جاهز او مش جاهز انا دلوقتي تلاجتي في الضمان المفروض تتعمل على حساب الشركة قالي الشركة مش مسئولة عن الجنزرة الخضراء قولتله يعني انا اللي مسئول! قالي ده كده يعتبر سوء استخدام ، قولتله اكتب اللي تكتبه انا كده كده هعمل شكوى يعني ايه سوء استخدام وانا المفروض مسافر و سايب التلاجة في البيت المفروض انها هتحافظلي على اكل وشرب بيجي مرتين تلاتة في الشهر! ده غير اننا داخلين على رمضان وانا مش عارف اجيب خزين لرمضان والفني مشي".
وقال عن شركة العربي ومشكلته معهم ،" بسبب احتياجي الشديد للتلاجة وخلاص رمضان كمان يومين ده خلاني اكلمهم تاني واقول اني جاهز للتكلفة وعاوز الفني يجي يركب الكابينة ، مع العلم اني بلغت خدمة العملاء ان انا غير راضي عن التكلفة وان التلاجة في الضمان ومع ذلك طلبت انهم يعملولي شكوى في قسم الشكاوي وان الفني يجي ويركب قطعة الغيار و هدفع لحد ما اشوف هيعملوا ايه وخدمة العملاء مش هنكر انهم بيتابعوا معايا بقالهم اسبوع بس مافيش تنسيق خالص مع بعض يعني ممكن الواحد يكلمني وبعدها بساعة واحد تاني يكلمني وابدأ احكيله القصة تاني ، وكل ما اطلب رقم الشكوى عشان اقدم بلاغ في حماية المستهلك بيقوليلي انها اتحولت لقسم الشكاوي وانهم هيكلموني مع العلم ان محدش كلمني من قسم الشكاوي التلاجة النهارده ب 18.000 جنيه وانا بناشد حماية المستهلك ان انا فلوسي كده اترمت في الارض ومش مستفاد بضمان لمدة 10 سنين وعاوز حقي".
