السيسي: المصريين مش هيناموا لو ذيعنا فيلم واحد من الحرب على الإرهاب

أكد الرئيس عبدالفتاح السيسي، على أن جميع الظروف الصعبة "بتعدي" بفضل الله سبحانه وتعالي، مضيفا: "الحقيقة مش عارف اقرأ الكلمة ولا أقول مشاعرى وإحساسي باليوم ده، عاوز أقول انا من الناس اللى حضرت الأحداث وشافتها وهى بتتعمل وبتتربت بشكل أو بآخر وزى ما انتوا شوفتوا الاحتفال كله وكل البرنامج النهاردة يعكس حاجة واحدة بس إن مهما كانت الصعوبات اللى بتقالبنا والظروف الصعبة اللى بنواجهها بفضل الله الأمور بتعدي".

السيسي: المصريين مش هتنام لو ذيعنا فيلم واحد من الحرب على الإرهاب

وأضاف الرئيس السيسي، كانت هناك مساع لتخريب تواجد الدولة في شمال سيناء عام 2011، قلنا من سنين مفيش إرهاب بيهد بلد لو كانت البلد على قلب رجل واحد، نعم هناك تكلفة وتضحيات، لكن سيأتي اليوم الذي نعلن فيه النصر".

وتحدث الرئيس عبد الفتاح السيسي، مع الشعب المصري، قائلا: "فى لقاء سابق قلت إوعوا عنيكوا تغفل أو تنام على حاجة داخل مصر.. وكمان ننتبه على حاجة ممكن تمسنا برا مصر".

وأضاف الرئيس عبد الفتاح السيسي، خلال كلمته بالندوة التثقيفية للقوات المسلحة بمناسبة يوم الشهيد: “أنا عايز أقول للشعب المصري كله كان عندي خيارين لما توليت المسئولية، الخيار الأول إني أشيلكم الهم وأخلي الموضوع معاكو.. وزي ما قلت مرة قبل كده إننا نوقف كل الأعمال ونعمل حشد إعلامي ضخم على الحرب اللي بتتم هناك والحرب مكانتش بسيطة يعني".

واستكمل الرئيس عبد الفتاح السيسي حديثه عن الإرهاب ومهاجمة مصر له قائلا: "لو جبتلكوا أفلام وتشوفوا حجم الخسائر والدمار والخراب، والله لولا الرأفة بيكم أوريكم فيلم واحد والله العظيم متهيألي كل المصريين ما هتنام، وكان أمامي خيار هو حشد كل جهود الدولة للحرب فقط، لكننا معملناش كده".

الرئيس السيسي لأمهات الشهداء: شرفتونا.. والثمن اللي قدمتوه ربنا هيعوضكم عنه 
 

رحب الرئيس عبد الفتاح السيسي، رئيس الجمهورية، بأمهات شهداء "مثلث القيادة"، الشهيد البطل مصطفي حجاجي، مساعد الدفعة 103 حربية، والشهيد البطل محمد علي العزب، مساعد الدفعة 104 حربية، والشهيد البطل عماد الدين أبو رجيلة، حامل العلم. قائلًا: شرفتونا، أنا عاوز أقولكم حاجة، يمكن من كام سنة كانت الدنيا لسه مش باينة وكل الناس خايفة، ونصحى على عمل كبير ودماء أبنائنا تنزف وأرواح تروح لربنا، دلوقتي تمن ده احنا مش هنقدر نعوضكم عليه، اللي هيعوضكم عليه ربنا، هيعوض أسر الشهداء والأم بالذات.

وتابع الرئيس السيسي: "انا عاوز اقولكم بقي.. مش بس الجيش اللى مش بينسي تضحيات الشهداء.. كل المصريين فاكرين.. في يوم الشهيد احنا بنتكلم عن الفريق عبد المنعم رياض اللى قدم روحه وضحي بحياته من حوالي 50 سنة.. ومش هننسي كل شهيد.. وكل مصاب حتى قدم حتة من جسمه.. لأجل البلد.. تكون في أمن وسلام.. بفضل الله سبحانه وتعالي.. وأبناء أسر كتير أخري.. الحمد لله رب العالمين.. تحقق الحلم ده.. بفضل الأرواح دي.. وبفضل الأسر المصرية.. اللى ربت ولادها وقدمتهم شهداء".
 

ويحضر الرئيس عبد الفتاح السيسى، رئيس الجمهورية، فعاليات الندوة التثقيفية الـ37 للقوات المسلحة تحت عنوان: "الثمن"، وشاهد الرئيس عبد الفتاح السيسى فيلما تسجيليا بعنوان "رموز خالدة" تناول بطولات بعض الشهداء على لسان أسرهم.
 

وتحتفل القوات المسلحة المصرية يوم 9 مارس من كل عام بيوم الشهيد، وذلك تخليدا لأرواح الشهداء والتذكير بالتضحيات التى قاموا بها في سبيل الحفاظ على الوطن.

جاء اختيار يوم 9 مارس من كل عام مع ذكرى استشهاد الفريق أول عبد المنعم رياض 1969 والذي ضرب أروع مثال على التواجد فى خط المواجهة فكان دائما في الصفوف الأمامية تأكيداً على تلاحم القائد مع جنوده في الميدان.