"معايا مكالمة مسجلة".. مرتضى منصور يهاجم حازم إمام بسبب أزمة قيد لاعبي الزمالك
شن مرتضى منصور، رئيس نادي الزمالك هجوماً جديداً على حازم إمام عضو مجلس إدارة اتحاد الكرة، بسبب عدم قيد صفقات الزمالك التي تم إبرامها خلال فترة الانتقالات الشتوية الأخيرة.
"معايا مكالمة مسجلة".. مرتضى منصور يهاجم حازم إمام بسبب أزمة قيد لاعبي الزمالك
وقال مرتضى منصور في تصريحات تلفزيونية، "حازم إمام هو اللي جاب كلاتنبيرج، حازم إمام هو اللي جاب مدرب المنتخب، حازم إمام هو اللي بيدير اتحاد الكرة، حازم إمام هو اللي وقف قيد لاعيبة الزمالك".
وأضاف مرتضى منصور، "حازم إمام بيكذب، محمد أبو الوفا ووليد العطار اتكلموا معاك على الموبايل وقولت ليهم لا مش هقيد والقرار بالإجماع وأنا مسجل كل كلمة حصلت في اتحاد الكرة من وقت ما دخلت لحد ما خرجت، طيب أنت قولت مكنتش عارف؟ طيب لما عرفت عملت ايه؟ ياريت تقول للجمهور".
واصل مرتضى منصور تصريحاته ضد حازم إمام قائلاً، "أنت بتقول أنا بغل وبحقد عليك، إزاي هحقد عليك، وأنا رئيس مجلس إدارة قناة الزمالك، والقناة أذاعت تقرير عن أهدافك ومسيرتك مع الزمالك".
وتابع مرتضى منصور، "أوعى تنسى إن أنا اللي سافرتك أودينيزي الإيطالي بعدما كان الدكتور كمال درويش، رئيس مجلس الإدارة في ذلك الوقت رافضًا لرحيلك، وأنا اللي رجعتك مصر، لما فشلت، وأنا اللي عينتك مدير كرة، أنت بتدمر الزمالك، أنت هتموت من مرتضى منصور، عشان طول ما أنا موجود أنت مش هتبقى رئيس نادي الزمالك".
حازم إمام يرد على هجوم مرتضى منصور: "هتموت وتكره الناس فيا"
وكان رد حازم إمام عضو مجلس إدارة اتحاد الكرة المصري، على تصريحات مرتضى منصور رئيس نادي الزمالك، بشأن أزمة قيد الصفقات الجديدة في قائمة الفريق الأبيض.
وكتب حازم إمام عبر حسابه الرسمي على "فيسبوك"، أول أمس الأربعاء: "طبعا كل اللي اتقال ده أي كلام وكذب كالعادة، والله العظيم ولا حد كلمني عن أي حاجة بخصوص الزمالك"، مضيفاً، "نفسي أعرف إيه كمية الغل والافتراء اللي عندك، هتموت وتكره الناس فيا، بتتبلى على الواحد وحاشر أسمي في أي حاجة، نفسي مرة تقول إنك غلطت، مش لازم تشيل الناس غلطاتك، حسبي الله ونعم الوكيل".
