صفاء دخلت مستشفى قويسنا للإجهاض خرجت بعاهة: "شالوا الرحم من غير موافقتي والدكاترة ضربوني في العناية"

قالت صفاء، ضحية واقعة الإهمال بمستشفى قويسنا المركزي بمحافظة المنوفية، إنها شعرت بالمرض فتوجهت للمستشفى: "روحت ليهم قالولي الرحم مقفقول لازم يفتح الأول قبل الإجهاض بعد ما قالولي الجنين مفيش حواليه مياه، قعدوا يعلقوا محاليل وياخدوا مني دم، وبقولهم ارحموني وريحوني، يقولولي مينفعش، فجالتي غيبوبة والتعب زاد عليا".

أضافت: "بقول للمرضة أنا تعبانة قالتلي ادخل نامي جوة ياماما، وكنت بدعي ربنا إني اقوم، وقالولي الجنين قد البيضا، وحرام نفتحلك ودخلت الحمام حسيت بهبوط ووقعت على الأرض، ودخلت في غيبوبة، وعملولي العملية لكن قطعوا من لحمي ومكنتش اعرف أني هعمل عملية، وفجأة دخلت على امل انزل الجنين طبيعي مش قيصري، فلقيتهم بيدوني بينج، ولقيت نفسي مصاريني مقطوعة، وفوجئت أنهم شالوا الرحم من غير موافقتي".

تابعت: "اتكتبلي عمر جديد، القولون اتفجر والرحم انفجر، وقطعنا مصارينك، بقول للدكتور إزاي قالي أنتي معاكي عيال إيه، قلت ليه 3 بتات قال ربنا يخلي، وشهر هنفتح بطنك ونعملك عملية، انا في عذاب بخاف أنام وبخاف امشي في الشارع، علشان الكيس ميتفجرش".

وتابعت: "بنتي شافت لحمة خارجة من بطني صوتت وقعدت تعيط، دمروا حياتي، وفقدت جنيني ومعاه حياتي، والدكاترة ضربوني في العناية المركزي، لما كنت في الرعاية وواحدة ست كبيرة يتنادي، ومكنش فيه حد، والمرمضة جاية ومعبرتش الست، ومشيت ومسألتش عن الست ولمحت الدكتورة وبقولها كلمي الست عاوزة تشرب، فكرت إني بقولها أنا عطشانة، فسكت أنا لكن الدكتورة قعدت تزعقلي وتقولي كل شوية عاوزة حاجة، ارحمينا بقة، وضربتني بالقلم على وشي".

وأوضحت: "غصب عني ايدي فتحت التليفون وأنا بكلم أخويا وسمع الضرب وكل حاجة، وبقول للدكتورة بتضربيني ليه، أنا ماشية، ووقفت علشان امشي، فقلبتني على ضهري وضربتني تاني، وكنت بصرخ من الألم، وضربتني بالأقلام على وشي، ودكتور تاني دخل والممرضات اتلمت عليا وكان بيتخانق علشاني، وقالي اقعدي ساكتة ومتقوليش لحد".

استكملت: "اتصلت بجوزي وحكيت ليه، وقلت ليه تعالى خدني من هنا، فقالي استحملي، ودخلت في غيبوبة فوقت لقيت نفسي مش مستوعبة، ولقيتهم بيقولوا جبنالك دم، وكلموا جوزي وقالوله مراتك بتموت، ووقتها ببص لقيت كيس الدم متعلق، والدكتورة خرجت جوزي وتقولي أنا أسفة ومتعرفيش حد".

وناشدت المسؤولين بمديرية الصحة في المنوفية، قائلة: "كل ده حصل في مستشفى قويسنا والمدير قالي أنا مليش دعوة دا إهمال من المستشفى وأنا هشهد معاكم، وخرجت لدكاترة برة وقالولي محتاجة عمليتين وكل واحدة بـ100 ألف جنيه، ومش هترجعي طبيعية، وأنا مش عارفة أجيب الفلوس منين، وأنا اتخذت إجراءات قانونية ضد المستشفى".