أسرة الشاب ضحية القتل علي يد جيرانه بسبب قطعة أرض:عايزين حقه واللي موته يتشرح زيه

ذهب الشاب " محمد ماهر نجاتي" الذي يبلغ من العمر 23 عامًا، برفقة والده ووالدته وجدته إلى أرضهم الزراعية لحصاد محاصيلهم الزراعية، ثم تُفاجأ الأسرة بقدوم جيرانه من قرية "منزل حيان" التابعة لمركز ههيا بمحافظة الشرقية، وأنهالوا عليهم بالضرب في أماكن متفرقة من أجسادهم للسيطرة على قطعة الأرض الزراعية التي يمتلكونها، وضاع الشاب "محمد" ضحية الاشتباك، حيث قاموا بقتله طعنًا بالسكين، وأجرى "مصر تايمز" بثًا مباشرًا مع أسرة الضحية ليرووا تفاصيل الواقعة. 

والد الضحية يروي تفاصيل الواقعة

قال "ماهر نجاتي" والد المجني عليه "محمد" لكاميرا "مصر تايمز": " الناس دي مش اول مرة يضربونا دي تالت مرة يتعدوا علينا بالضرب،  وإحنا كنا رايحين الارض نحصد محصول تقاوي البرسيم، لقيناهم فجأة وقفولنا ومش عايزينا ندخل الأرض، وضربونا انا وزوجتي وأمي ومحمد إبني، وإبني  لما جري اتطمنت انه في أمان، و ضربوني على راسي وايدي وضهري وفتحولي راسي، فروحت البيت علشان الجرح وبعد شوية لما بقيت أحسن رجعت للأرض لقيت إبني مرمي في الأرض فسألته مالك يا محمد قالي ضربوني وواحد منهم قال لإبنه موته فضربني بالسكينة"

وأضاف باكيًا: "أنا حاسس اني انتهيت من الدنيا كلها، ونفسي اروح لإبني حياتي خلاص كدة انتهت مش عايزها، ماليش نفس للأكل خلاص، وكل شوية بروح المقابر لإبني".

 
وقالت جدة الضحية: "إحنا روحنا نحصد المحصول ولسة هنبدأ، لقيناهم دخلوا علينا وبيقولوا لحفيدي انت جيت يا بطل، وقاموا ضربوا ابني على راسه ودراعه وضهره ودماغه اتفتحت، هما كانوا 5، وواحد فيهم كتف حفيدي وقال لابنه موته". 

الجدة تطالب بسرعة القصاص

وطالبت بسرعة القصاص وهي باكية: "منعونا عن أرضنا مش بنروحها، كل اللي عايزاه ان اللي قتلوا حفيدي يموتوا زي ما موتوه، لإني خسرت حفيدي وبخسر إبني كمان، إبني طول الوقت في المقابر وبييجي يعيط ويصرخ على إبنه، أنا بطلب سرعة القصاص". 

وروت والدة الضحية تفاصيل قتل ولدها وهي تبكي قائلة: "كانوا جايين وناويين يأذونا لإنهم جايين بعصيان خشب وأسلحة، وضربونا كلنا، ولما جوزي لقى في ضرب وابننا ممكن يتأذي قاله اجري يا محمد، وانا قعدت اصوت بستغيث بأي حد ييساعدنا بس مفيش حد في المكان خالص، وابني جري مسافة طويلة جدا بس عرفوا يجيبوه علشان كانوا بيجروا وراه بالموتوسيكلات بتاعتهم، انا كل اللي عايزاه القصاص من اللي قتل ابني من غير رحمة، واحد فيهم قبل كدة قالي احنا هندبحلك ابنك، عايزة حق ابني يرجع عشان يرتاح في تربته، وعشان جوزي كمان يرتاح".