الجمعة 29 مارس 2024 الموافق 19 رمضان 1445
رئيس التحرير
حازم عادل
تحقيقات وتقارير

(س) و(ج) كل ما تريد معرفته عن جدري القردة.. متواجد فى القوارض والسنجاب وممكن يعدي بعض فصائل الكلاب.. و بينتقل عن طريق الإتصال الجنسي.. و الأطفال وضعيفي المناعة وكبار السن فوق 70 عاما أكثر عرضه الإصابة

السبت 21/مايو/2022 - 11:13 م
صورة أرشيفية
صورة أرشيفية

كشف الدكتور إسلام عنان أستاذ اقتصاديات الدواء وعلم انتشار الأوبئة، كافة التفاصيل حول جدرى القردة الذي أثار الرعب فى نفوس العالم خاصة بعد ظهور عدد من الحالات فى إسرائيل والدول الأوروبية ، واستعرض الدكتور إسلام عنان فى شرح مفصل كل ما له علاقة بجدرى القردة.. 

س: هل هو نفس الجدري القديم اللي بيموت؟
ج: لأ، الجدري (smallpox) انتهى من العالم 1980 والجيل القديم هو اللي فاكره من مكان التطعيم وحالياً مش بندي التطعيم للجدري لذلك معرضين للاصابة اكتر من فيروسات شبيه للجدري زي جدري القردة (monkeypox).

س: يعني تطعيم الجدري ينفع مع جدري القردة؟
ج: نعم، وفعال بنسبة 85٪؜ وفي 2019 أمريكا وافقت على أول لقاح متخصص في الmonkeypox واسمه Jynneos.

س: ليه مش بننتج اللقاح؟
ج: عشان انتشار جدري القردة مش عالي ووفياته اقل من 1٪؜ وبيتعالج بمضاد للفيروسات وفي خلال 4 اسابيع واخرها 6 اسابيع بيخف المريض بس هو موجود بكميات قليلة.

س: ليه هو انتشاره مش زي كورونا؟
ج: لأ معامل انتشاره (Ro) اقل من (1) وده معناه محتاج اكتر من مصاب عشان يصيب شخص سليم احصائياً… ولو فاكرين كورونا كان معامل الانتشار Ro (2-3) يعني المصاب بيعدي 2 او 3 فالمنحنى بيزيد لكن جدري القردة في كل موجاته الاصابات تراجعت بسرعة.

س: يعني مش هيبقى جائحة زي كورونا؟
ج: طبعاً مفيش اجابة قاطعة 100٪؜ بس طبيعة ونمط هذا الفيروس صعبة جداً في الانتقال ما بين البشر واحتمال تحوره ضعيفة للغاية لذلك فرضية انه يبقى جائحة عالمية صعبة.

س: هو بيجي من القرود؟
ج: لأ… هو اسمه كده عشان تم التعرف على الفيروس في الدنمارك ضمن مجموعة قرود المعمل ولكن هو موجود في القوارض والسنجاب وممكن يعدي بعض فصائل الكلاب زي ما حصل في 2003 في شحنة كلاب برية جاية من افريقيا لأمريكا وعدت 70 شخص بسبب اختلاط الكلاب بالإنسان… بس ملحوظة مهمة كلاب البيت والشارع في مصر مش ناقل للمرض عشان محدش يقلق من الكلب بتاعه.

س: هو موطنه الاصلي افريقيا؟
ج: ده صحيح… اول مرة اصيب به البشر كان في الكونغو (زائير وقتها) سنة 1970 وبيقولو ان اول مصاب في الموجة الحالية كان قادم من نيجيريا.

س: يعني ده مش فيروس جديد ولا دي أول موجة؟
ج: الفيروس بقاله عشرات السنين… وكان فيه موجة في 2003 أمريكا و2009 في السودان بس كان بيتم السيطرة عليها بعدد إصابات قليلة ووفيات نادرة لو فيه موارد وآليات صحة جيدة في البلد المصابة.

س: طب العدوى بتحصل إزاى؟
ج: عن طريق عضة من الحيوان المصاب او خدش لإنسان او يحصل انتقال لعاب او سوائل الحيوان مع الإنسان وبعد كده المريض بيفضل في فترة حضانة الفيروس 5 ايام تقريباً (ونادراً لحد 20 يوم) وإنتقال العدوى من شخص لشخص صعبة للغاية عن طريق رزاز كبير الحجم من الجهاز التنفسي للمريض لشخص سليم بس محتاجة حمل فيروسي عالي ووقت تعامل طويل عشان العدوى تحصل وبرضو العدوى بتحصل من الصديد اللي موجود في الطفح الجلدي الموجود على جسم المريض وبرضو بينتقل عن طريق الاتصال الجنسي وعشان كده بتقول ان معامل انتشاره بين البشر قليل.

س: هي الاعراض ايه؟
ج: بعد فترة حضانة الفيروس بتبدأ بأرتفاع في درجة الحرارة ووهن في العضلات وصداع وأوقات تورم في الغدد الليمفاوية وبعد كده ظهور الحويصلات والبثرات المليئة بالصديد (الطفح الجلدي) المميز للجدري (pox) على الوجه والإيدي والرجلين… واللي بتروح بعد 3 أسابيع تقريباً. لو فيه عناية كويسة والمريض معندوش مشاكل معينة تمنع الشفاء ممكن معدلات الوفاة تبقى اقل من 1٪؜ ولو لأ ممكن اوصل 10٪؜.

س: فيه فئات معرضة للأصابة الشديدة اكثر من غيرهم؟
ج: الاطفال وضعيفي المناعة وكبار السن فوق 70 والذين لا يقدرون على تناول الأدوية المضادة للفيروسات.

س: كيف يتم اكتشافه وتشخيصه؟
ج: تشخيص مبدأي إكلينيكي بالاعراض بعد كده لازم معمل لعمل PCR او antigen test وبعض الكواشف الاخرى لعزل الفيروس لو احتاجنا لذلك.

س: كيف يمكن الوقاية؟
ج: دايما النظافة هي الحل الاول مثل غسل الأيدي وطبعاً عدم التعامل مع الحيوانات البرية على الاطلاق وعزل والبعد عن المصابين وعدم التعامل معهم مباشرة لو ظهر عليهم اعراض ولو ظهر اعراض على حيوانات بيتم عزلها وعزل المخالطين.

س: طب والعلاج؟
ج: مضادات للفيروسات وهي غير متخصصة في جدري القردة ولكنها فعالة… وطبعاً مع علاج الاعراض. 

س: عالمياً ايه المفروض يتغير عشان منسمعش تاني عن فيروسات من الحيوانات البرية بتقفز الانسان؟
ج: "على المستوى العالمي متهيألي ده وقت منع تداول والاتجار والتعامل مع الحيوانات البرية كفاية ما حدث مع كورونا… مش عارف ليه مش عايزين نسيب الحيوانات في حالها".

س: لا بجد الماسك هينفع؟
ج: طبعاً في التعامل مع المرضى لازم ماسك بما انه بينتقل عن طريق سوائل الجهاز التنفسي.

س: هل هيدخل جدري القردة مصر؟
ج: مفيش اجابة للسؤال ده مؤكده… كل شيء ممكن ووزارة الصحة المصرية عندنا الحمد الله قوية في الطب الوقائي والوبائي ولو فيه حالات هيتم اكتشافها بسرعة وهيتم التعامل معاها.