اتحاد أمهات مصر يعلن عن 5 نماذج جديدة لفتيات موهوبات في مبادرة "المستقبل لهن"

وقالت عبير أن الحالة الأولي للطالبة مارولينا ماجد جورج، بمدرسة الشهيد محمود علي الخطيب الرسمية لغات

التابعة لإدارة عين شمس التعليمية، حيث تقول والدتها: "عندها موهبة الرسم من وهي صغيره وأول ما لاحظت دا بدأت أوفر لها ألوان وورق وأشجعها أنها ترسم وتعبر عن اللي حواليها ونعلق الرسوم في أوضتها أو علي التلاجة عشان كل اللي في البيت يشوفها.. ولما كبرت بدأنا نروح متاحف وأماكن أثرية ونقعد نرسم هناك ونتفرج علي اللوحات والتماثيل زى المتحف القبطي، والمتحف المصرى والمتحفين دول تحديدا عندهم إهتمام بالطفل والتربية المتحفية له، وكمان قصر الأمير طاز كنا بنقعد بالساعات بس عشان نرسم ونمشي".

وأضاف والدة مارولينا: "وبعد كدة إبتديت أدور علي مسابقات اشترك لها فيها عشان تكتسب ثقة في نفسها وفعلا فرق معاها جدا الموضوع دا وكانت بتبقي مبسوطه حتي لو مكسبناش لكن التجربة حلوة أوى ومشجعة، ولما كبرنا أكتر بقينا ناخد كورسات رسم عشان تساعدها علي تنمية الموهبة وأكيد طبعا دا فرق معاها كتييير.. المهم في كل دا أنا كنت بحاوطها بكلمات تشجيع وأساعدها وكمان أفتخر بيها قدام كل اللي حواليا عشان تعرف اد ايه هي مميزة عندى وكمان تكون مميزة في عين نفسها".

والنموذج الثاني للطالبة لوجين محمد صلاح الدين، بمدرسة يوسف السباعي الرسمية للغات بمصر الجديدة التابعة لإدارة النزهة التعليمية، موهوبة في الرسم منذ عمر الأربع سنوات، تضيف والدتها: "وأنا بهتم بموهبتها جدا، هي دلوقتي 16 سنة، أنا بنتي ماشاء الله عليها موهوبة وعبقرية في الرسم والدراسة من المتفوقين، واشتركت في مسابقات وبتاخد دورات أون لاين في الرسم، ولها صفحة علي الانستا".

أما النموذج الثالث، للطالبة ملك أيمن مجدى، بالصف الرابع الإبتدائي بالمدرسة المصرية للغات قباء التابعة لإدارة السلام التعليمية، وهوايتها الرسم وتمارس رياضة هاند بول في فريق 2011 نادى الطيران، كما تقول والدتها: "اكتشفت من بدرى إنها بتحب الرسم وبتحب تفتح اليوتيوب وترسم منه أوى بجيبلها كل اللى بتطلبه يخص الرسم علشان تنمي موهبتها وبشجعها الصراحه لأنها بتعشق الرسم".

أما النموذج الرابع، للطالبة أروى أحمد محمد، بالصف الخامس الإبتدائي بمدرسة مجمع الملك فهد التجريبي متميز لغات، بدأت رياضة الجمباز من عمر الخامسة وانضمت لفريق جمباز الايروبيك وشاركت في بطولات تحت سن ٨ سنوات وحصلت علي ميداليات فضه وتتدرجت في اللعبة حتي وصلت لبطوله تحت سن ١١ سنة وقد حصدت الميدالية الذهبية والمستوى الأول ببطولة كأس مصر وجمهورية ٢ فردي وثلاثي وخماسي والمستوي الأول في بطوله الفراعنة للجمباز الايروبيك لعام ٢٠٢٠-٢٠٢١ في الخماسي تحت إسم التربية والتعليم، كما ذكرت والدتها.

أما النموذج الخامس، للطالبة جني وحيد محمد أبو العزايم، طالبة بالصف الخامس الإبتدائي بمدرسة مجمع الملك فهد التجريبي متميز لغات، وتقول والدتها: "بدأت رياضة الجمباز الفني بنات، وشاركت في بطولات الجمهوريه ١ و ٢ وحصلت علي ميداليات ذهبية والمستوي الأول ثم انتقلت للجمباز الايروبيك ولعبت تحت سن ١١ سنه وحصلت علي المستوى الأول والميداليات الذهبية فردي وثنائي وثلاثي ببطوله كأس مصر وجمهوريه ٢.