"شكله حكومة ياض".. السقا يروي مواقفه الغريبة: بيبقى شكلي هجام وانا لابس الكاب
الثلاثاء 19/أكتوبر/2021 - 10:59 م
روى الفنان أحمد السقا أحد المواقف التي تعرض لها بسبب عدم حبه لقيادة السيارات، وتفضيلة استخدام التاكسي أو الميكروباص في فصل الشتاء لرغبته في تعلم لغة الشارع ومخارج الحروف من الجمهور حتى يكون متجدداً بإستمرار.
قال: "مرة في الشتاء وكانت دقات الساعة تشير إلى الثانية بعد منتصف اليل وكنت عاوز أنزل ومش عايز أسوق ولا حد يسوقلي نزلت من البيت وأنا ساكن في الصحراوي وكانت الدنيا هوا واستوقفت ميكروباص وكنت مش حالق دقني ولابس كاب".
تابع في لقاء خلال برنامج "كلمة أخيرة" الذي تقدمه الاعلامية لميس الحديدي على شاشة " ON" قائلاً: "وقفت ميكروباص وقلتله نزلني مشعل في الهرم بالقرب من نزلة السمان عشان أكمل بتاكسي وأوصل منطقة سقارة في الاسطبل بتاعي".
أكمل: "ركبت في كنبة كان فيها شباب شكلهم نوش سمعتهم بيقولوا لبعض شكله حكومة ياض نعمل إيه قالوا لبعض ننزل الإشارة الجاية أفضل وبالفعل نزلوا ولم يتبق سوى أنا والسائق فسألته: أخرك إيه قالي محطة مشعل؟ فطلبت منه بذوق شديد إنه يكمل بيا الطريق صوب الجبل نظير حصوله على ما يطلبه من المال ففاجئني برد فعله قائلاً: أبوس إيدك خد أي حاجة ماعدا العربية".
استطرد: "قلتله أنا مش حرامي أقنعته وخلعت الكاب وعرفني وقعدت تلت ساعة اقنعه إني أحمد السقا وأخدته وصلينا الفجر سوا وشربنا شاي"، ومازح لميس الحديدي قائلاً: "لما بلبس الكاب بيبقى شكلي هجام شوية".
