الثلاثاء 19 مارس 2024 الموافق 09 رمضان 1445
رئيس التحرير
حازم عادل
مقالات الرأى

من بريد القراء

الثلاثاء 07/سبتمبر/2021 - 12:47 ص

مشهد 1   ليل/داخلي
شقة سكنية /الصالة
كلوز على يد رجل يجلس على كرسي من كراسي السفرة  أمام اللابتوب الخاص به.. يفتح الفيسبوك ويدخل على جروب بعنوان " للرجال فقط".. يضغط على  post  ثم يحرك أصابعه في تردد على حروف الكيبورد.. بعدها يبدأ في الضغط على الحروف والكتابة ونرى ما يكتبه
صوت الرجل ( يقول ما يكتب)
مساء الخير.. دا مش الاكونت الحقيقي بتاعي.. انا عملت الاكونت دا مخصوص عشان اكتب مشكلتي 
هعتبره زي عمود بريد القراء زمان.. وإني ممكن ماكتبش اسمي الحقيقي.. أرجو ماحدش من الاعضاء يتريق 
انا مشكلتي غريبة شوية.. انا بكل صراحة مراتي بتشتمني وأحيانا ايديها بتطول عليا.. وانا عشان بحبها مش قادر ابعد.. الحكاية بدأت من الخطوبة
قطع

مشهد 2      نهار/داخلي
شقة سكنية/الصالة
6 أشخاص يجلسون على السفرة وأمامهم أنواع متعددة من الطعام ( رجل 60 سنة – سيدة 50 سنة – فتاة 26 – شاب 30) 
السيدة.. اعزمي على خطيبك.. شكله مكسوف
الشاب.. لا والله يا طنط انا باكل اهو دا زي بيتي بالظبط.. يمد الشاب يده ناحيه طبق به قطعة بانيه
كلوز على يده التي تتلقى ضربه من يد الفتاة دون سابق إنذار
الفتاة.. مش قلنا مافيش أكل بإيدينا.. هبتدي أعاقبك لو ماستخدمتش الشوكة والسكينة.. ينظر الشاب لها بذهول ثم للرجل والسيدة محاولا ان يداري إحراجه بابتسامه صفراء
قطع

مشهد 3    ليل/داخلي
أمام باب شقة سكينة
يقف الشاب أمام الباب ويخرج سلسلة مفاتيحه ثم يضع المفتاح في الباب 
صوت الشاب ( نستمعه معلقا على الصورة)
اتجوزنا وخلفنا وولادنا بدأوا يستوعبوا وأنا طول الوقت بقول أكيد اللي بتعمله دا حب زيادة.. طريقة معينة من الاهتمام.. بحاول الاقي طريقة تريحني وماتقلش من كرامتي من اللي بشوفه منها.. يفتح الباب ويدخل
قطع


مشهد 4    ليل/داخلي
الشقة/الصالة
يدخل الشاب من الباب يتفاجيء بزوجته تقوم من مكانها وتخلع حذائها وترميه في وجهه
الزوجة.. هو انا مش قلت 100 مرة قعدة القهوة اللي بعد الشغل دي بلاش.. دا انت لو حيوان كنت هتفهم 
صوت الرجل..الموضوع بقى بيتكرر تقريبا يوميا.. يا ضرب يا شتيمة حتى قدام الولاد
قطع

مشهد 5     ليل/داخلي
شقة الزوجية/غرفة الأولاد
يجلس الاب مع طفلين ( بنت وولد في سن الثامنة) يلعبان معا.. يحملهم الاب على ظهره ويمشي بهما
تفتح الام الباب وتقف ساندة يدها على الاكرة وتنظر له من فوق لتحت
الزوجة.. البعيد ماعندوش دم .. مابيحسش .. جبلة.. اللي انا بعمله الصبح من مذاكرة ودروس وحفظ تيجي انت تضيعه بليل بالهبل دا.. يلا قوم اتخمد وسيب الولاد تنام
تخرج من الغرفة وتغلق الباب بشدة
قطع

مشهد 6     ليل/داخلي
كلوز على يد الرجل وهي تكتب البوست على الجروب
صوت الرجل
انا تعبت ومش عارف اعمل اية.. انا بحبها وبينا أولاد وخايف عليهم لو طلقتها عشان كرامتي.. من رأيكم أعيش على كدة وخلاص ولا اطلقها؟