مدرب الزمالك: "أنا مقهور ومش عارف محدش عايز يفرحنا ليه؟"
الإثنين 30/أغسطس/2021 - 01:05 م
أبدى أحمد عبدالمقصود، مدرب الفريق الأول لكرة القدم فى نادى الزمالك، حزنه الشديد من الأحداث التى تبعت تتويج الزمالك بالدورى المصرى، وقال فى تصريحات إذاعية عبر برنامج "اللعبة الحلوة": "أنا مقهور".
وأضاف: "لدى عروض من السعودية وفى الظروف دى هصلى استخارة والموضوع صعب للاستمرار فى الزمالك، فقد انضممت لجهاز الزمالك قبل نهاية الدور الأول للدوري بمباراتين، وخضنا مباريات صعبة للغاية وحلاوته فى التتويج به بعد هذه الصعوبات".
وأكمل: "اللاعبون والجهاز الفنى تعبوا أوى بعد الخروج من أفريقيا للتتويج بالدوري وتخطينا أزمة رحيل مصطفى محمد وساسى بنجاح"، وعن أزمة شيكابالا قال: "أمضينا ساعة نحاول إدخال زوجاتنا وأولادنا بهدوء مع مسئولى الاستاد ولكن دون جدوى، ومحضرناش التسخين، حميد أحداد خرج من الملعب فى الدقيقة 60 وزوجته كانت بره الاستاد وخرج يجيبها، محدش عايزنا نفرح ليه".
وزاد مدرب الزمالك: "شيكابالا لو قتل قتيل مكنش هياخد 8 أشهر إيقاف، وبحق ربنا شيكابالا راح عند الباب وأحمد مجاهد قاله مالكش دعوة مين دخل ومين خرج وشيكابالا قاله أنت عشان أهلاوى بس، أنا مصدوم فى العقوبة ومش مرتاح، الفار كان بايظ فى ماتش الزمالك والجونة وعرفنا بعدها ولما قولت للحكم فى الملعب شوف الفار منحنى انذار ".
وأتم حديثه: "إيه المشكلة لما ناخد الدوري دى كورة مش قرآن، ليه المخرجين ترفض إعادة بعض اللعبات للزمالك، ليه الحكام مترجعش للفار، ومتوقع إلغاء الفار باستثناء مباراة الأهلى والزمالك".
