خالد الدرندلي: رسالة الرئيس السيسي رفعت معنويات اللاعبين قبل مواجهة الأرجنتين
هنأ خالد الدرندلي، رئيس بعثة المنتخب الوطني في كأس العالم، الشعب المصري والعالم العربي على فوز مصر على أستراليا والتأهل للدور الـ16 من بطولة كأس العالم، مردفًا: «إمبارح عند الفندق بعد الفوز، في مواطن هناك قالي شكرًا على اللي عملتوه، خليتوا الأطفال الصغيرة هنا انتماءها يزيد، في آلاف من المواطنين قدام الفندق مستنيين اللاعبين علشان يحتفلوا معاهم».
وقال خالد الدرندلي، خلال مداخلة هاتفية مع الإعلامي أحمد موسى، مُقدّم برنامج «على مسئوليتي»، عبر قناة «صدى البلد»، إن المدير الفني للمنتخب، بقيادة حسام حسن، كان له دور كبير بجانب اللاعبين وكل أفراد البعثة، موضحًا: «هاني أبو ريدة قائد المركب، الراجل ده عمل حاجات كتيرة جدًا، ولازم ياخد حقه من خلال علاقاته، وبيقدم الكثير من أجل خدمة المنتخب، في تخطيط اتعمل علشان نوصل للنقطة دي، تم إعداد المنتخب جيدًا، ولعبنا إسبانيا وروسيا والبرازيل والسعودية».
وتابع الدرندلي: «حسام حسن هدفه دائمًا تحفيز اللاعبين للفوز، كمان عنده رؤية، نبقى متقدمين بهدف يبقى عاوز يجيب الهدف التاني والتالت، أنا سافرت بعثات ومعسكرات كتيرة، المعسكر ده فيه حالة من الالتزام الكبير الشديد من اللاعبين».
ولفت الدرندلي إلى أن المنتخب بينتقل من ولاية إلى أخرى وفقًا لنظام تم إعداده مسبقًا، معقبًا: «كل فندق نقعد فيه لمباراة، وإحنا وماشيين، الاستاد اللي في الفندق بيعملوا لينا حفلة وإحنا ماشيين، عاوز أقولكم في مواطنين أجانب وأمريكان سافروا من ولايات تانية وروحوا مدينة دالاس علشان يشجعوا المنتخب الوطني».
وأكمل: «هنتحرك اليوم الساعة 12:30 بتوقيت أمريكا لمدينة أتالانتا استعدادًا لمباراة الأرجنتين في الدور الـ16 يوم التلات الجاي، كمان رسالة الرئيس السيسي وتهنئته لينا بتزود الثقة وتخلي المسؤولية أعلى عند اللاعبين».
واستطرد: «لاعيبتنا مش عندهم رهبة من منتخب الأرجنتين، هنقدم مباراة تليق بينا، الرأس الأخضر مش أحسن مننا، محمد صلاح قائد الفريق برا الملعب وجواه، ومحبوب من الكل هنا، وهو سليم ومفيش أي حاجة، ليه مكانة بين زملائه وكلهم بيحبوه، وكلامه ليهم بمثابة نصيحة وبيتقبلوا الكلام».
وأشار الدرندلي إلى أنه تلقى تهنئة من عدد كبير من الأشقاء في العالم العربي كله، «إحنا لينا ظهر في كل حتة»، وإن شاء الله نرجع وإحنا عاملين إنجاز. https://www.youtube.com/watch?v=tdCHe6QKTyk
