السيسي: نقل مياه الصرف 150 كيلومتراً عكس الاتجاه لزراعة مليوني فدان
شهد الرئيس عبد الفتاح السيسي، اليوم افتتاح عددا من المشروعات التنموية ومنها مشروع الدلتا الجديدة وعدد من المشروعات التابعة لجهاز مستقبل مصر للتنمية المستدامة وذلك في إطار متابعة جهود الدولة لتعزيز الأمن الغذائي وزيادة الرقعة الزراعية من خلال المشروعات القومية الكبرى.
حيث أكد الرئيس السيسي أن المشروع علشان يتعمل كبير جدًا، ومشروع عايز شرح مش في كلمتين. المهم علشان الناس تعرف إن المشروع كبير جدًا، وفرصة نشرح المحطات والشبكات والمسارات اللي اتعملت، وتقولي جزء من التكلفة.
وأوضح الرئيس عبد الفتاح السيسي: «إحنا بنجمع مسار أكثر من 150 كيلو متر علشان يتنقل لمحطة الدلتا الجديدة، ونجيب الصرف الزراعي بنجمعه في عكس الاتجاه لمسافة 150 كيلو متر».
وأضاف الرئيس السيسي: «لو قدمنا المشروع بالطريقة دي بنبخس حق جهد الدولة، إحنا بنتكلم في رقم كبير، لو قلنا إن الفدان بنيته الأساسية اتكلفت 400 ألف جنيه، إنت بتتكلم في 800 مليار جنيه، علشان توفر فرص عمل. إحنا بنتكلم لـ2 مليون إنسان».
وطالب الرئيس السيسي المتحدثين بشرح المشروعات للناس بهذه الطريقة، حتى يدرك المواطن أن عملية التنمية في أي دولة تحتاج إلى جهد وعمل وإخلاص من كل أجهزتها، مؤكدًا أن «الدولة لازم يكون عندها أمل وعمل».
وأشار إلى أن نظم الري التي أُنشئت في عهد محمد علي باشا كانت تعتمد على المسار الطبيعي للمياه، موضحًا: «كان شق الترع والمصارف مبني على انزلاق طبيعي للمياه، لا كان محتاج شبكات كهرباء ولا معدات ترفع المياه، لكننا اضطرينا نعمل كده واتحركنا على عكس قوانين الطبيعة، من المنخفض إلى العالي، ونجيب المياه بعد ما توصل الإسكندرية وتنزل بمحطات علشان تنتهي إلى مشروع الدلتا الجديدة».
واختتم الرئيس السيسي حديثه قائلًا: «في النهاية علشان أقول عندي 2 مليون فدان بفرص عمل مستقرة، وشركات القطاع الخاص هي اللي بتقوم في إطار خطة زراعية متكاملة، وفيه مستثمرين فعليًا معانا، لكن بنوجههم في نوعية المحاصيل علشان يكون إنتاجها أفضل».
وأضاف: «إنتاج البنجر في الأراضي الصحراوية بيزيد لأكثر من 50%، بينما القمح في مشروع الدلتا ذات الأراضي الطينية بيكون أفضل من الأراضي الصحراوية، وإحنا جبنا المستثمرين وقلنا لهم هنزرع بشكل محدد بناءً على خطة استراتيجية، زي القمح أو الذرة».
وأكد الرئيس السيسي: «لو عندي 1000 فدان بزرعهم، عندنا رؤية نحقق بيها متطلبات الدولة لصالح مواطنيها، وأوعوا تتصوروا إن فيه دولة في العالم عندها اكتفاء ذاتي كامل، ومهما عملت في مصر لا يمكن أحقق اكتفاء ذاتي كامل، لازم نفهم الحكاية دي».
