النجمة حنان سليمان: أول حاجة بهتم بيها في أي عمل هو المخرج ثم المؤلف
قالت النجمة حنان سليمان ، :" كنت خايفة جداً من دوري في مسلسل "اللون الأزرق"، والمخرج سعد هنداوي ساعدني جداً في التفاصيل واستمتعت بالعمل معاه لأنه فنان وبيتعامل برقة “ متابعة :” دايماً بخلي عندي مرجعية لأي شخصية بقدمها، وبدوّر على خلفيتها ودوافعها وسماتها الشخصية علشان أقدر أنحاز لها، وده مهم للممثل إنه ينحاز للشخصية حتى لو مختلف معاها".
وأضافت سليمان ،في تصريحات خاصة لبرنامج "منورة بفنها" تقديم عماد إسماعيل على شعبي اف ام :"مسلسل "فات الميعاد" كان عمل مختلف ومتعوب عليه وملامس للواقع، والشخصيات اللي فيه كانت بتتكلم بلسان حال المجتمع".
وأوضحت :" أول حاجة بهتم بيها في أي عمل هو المخرج ثم المؤلف، لأن دول تلقائي اللي مسؤولين يودوني لعمل محترم ومتماسك “ مضيفة :” أنا معجبة بالأجيال الجديدة وبيضيفولي كتير وبشوف إن عندهم حاجة ما كانتش عندنا وهي الجرأة والمدخلات والتفاصيل اللي عندهم أكتر".
وتابعت :" بقيس أدائي في العمل من أول يوم تصوير وأول مشهد في كل يوم تصوير، وفي أول يوم تصوير ما بعرفش أنام أو أهزر في اللوكيشن ، وأول ما قريت ورق مسلسل "سارة" اتخضيت، وفي العادي بعرف أتوقع العمل وأنا بقراه لكن المسلسل ده خالف توقعاتي، وحقق عند عرضه نجاح أكبر مما توقعت ويحسب للمخرجة شيرين عادل".
وأكملت النجمة حنان سليمان ، :" كنت محظوظة بدور "نهى" في فيلم "الحب فوق هضبة الهرم"، والشغل مع عاطف الطيب كان راقي جداً والمنتج عبد العظيم الزغبي كان فنان واعي “موضحة :” فيلم "الحب فوق هضبة الهرم" اتصور في بيت حقيقي في شبرا، والكاست كان كله مبدع والنجم أحمد زكي كان بيهتم بكل واحد فينا ولو اتأخرنا في التصوير لوقت متأخر كان بيوصلنا بعربيته".
وإختتمت تصريحاتها قائلة :" اشتغلت مسرح مع الفنان الكبير محمد صبحي وأنا في سنة أولى معهد، ودي كانت محطة مهمة جدا في مسيرتي واتعلمت إني أعرف قيمة اللي بقدمه “متابعة :” قيمة الدور في تأثيره مش في مساحته، وده مثلا اللي خلاني أشارك في مسلسل "الضوء الشارد".
وأشارت النجمة حنان سليمان ، :" نفسي أشتغل كوميدي بقى، وتعبت من النكد".
