دينا دياب: كنت خايفة الجمهور يحصرني في صورة الراقصة.. لكن ردود الفعل فاجأتني
تحدثت الفنانة دينا دياب عن الانتشار الواسع لـ فيديو الرقص الخاص به، الذي تصدر التريند في مصر والوطن العربي، كما لقى بردود فعل إيجابية واسعة من قِبل الجمهور والنقاد.
دينا دياب تكشف كواليس جديدة وراء فيديو الرقص الخاص بها
وقالت دينا دياب خلال لقائها في برنامج إي تي بالعربي: الفيديو دا أنا مكنتش متخيله إنه هينتشر الانتشار الكبير دا انتشر في دول برا مصر في الوطن العربي وبرا الوطن العربي، عشان مجتمع الراقصين منتشر في العالم كله، في الأساس أنا برقص في مكان في وسط البلد اسمه استديو سمارة دا المكان اللي بنتمي ليه حاليا برقص فيه.
أضافت: زمان مكانش في اهتمام بأن أنا بستعرض جسمي على قد ما أنا عايزة انقل حالة عايزة احكيلك باستعراضي دا بكل جوارحي وحركات جسمي بوريلك فن، بدل الرقص بتاعة زمان مش كلها مستورة أوي بس كانت شيك ومتحسيش باشمئزاز وانتي بتتفرجي عليها الموضوع كان شيك أوي وفي رقي.
تابعت: كنت خايفة الناس متتقبلنيش وكنت خايفة يقولوا إيه دا دي رقاصة لقيتهم شايفين اللي أنا شايفاه وحاسين اللي حساه وشايفين أنه مش ابتذال ومستقبلني بقبول وحب مكنتش مصدقة وكنت بقول هو أنا بحلم تعليقات جميلة من ناس عادية وفنانين ونقاد.
استكملت: دي كانت رسالة كنت بتمنى في يوم من الأيام إني أوصلها أقول للناس أن الرقص المصري أو الشرقي مش حاجة وحشة ولا هو ابتذال ولا هو حاجة رخيصة دا فن موجود في تراثنا من سنين كان نفسي أكون الشخص اللي يقدر يرجع دا أكون أنا البداية مصر مليانة مواهب بنات وفنانات بيرقصوا حلو جدا.
