حسيت إني نفرتيتي.. فريدة عثمان تكشف تفاصيل ظهورها الفرعوني فى افتتاح المتحف المصرى الكبير| حوار
بعد مشاركتها اللافتة في العرض العالمي لافتتاح المتحف المصري الكبير، أثارت السباحة المصرية وبطلة العالم فريدة عثمان إعجاب الجمهور بعدما ظهرت بإطلالة فرعونية مستوحاة من ملكات مصر القديمة، ضمن حدث ثقافي ضخم تابعه العالم عبر الشاشات، في واحدة من أبرز العروض التي قدمت مصر بشكل مبهر ومشرف.
وفي هذا الحوار، تكشف فريدة لـ"مصر تايمز" كواليس اختيارها للمشاركة، وكيف تم تجهيز الإطلالة، وشعورها خلال وقوفها أمام العالم ممثلة للحضارة المصرية.
في البداية.. كيف جاءتك دعوة المشاركة في عرض افتتاح المتحف؟
ج : من حوالي شهر تم التواصل معايا بخصوص المشاركة، وقالولي إن الموضوع سري جدًا، ومينفعش نتكلم عنه أو ننشر أي حاجة، ووقّعت على إقرار بكده ، وبعدها عملنا مكالمة «زووم» وبدأت التحضيرات.
ولما عرفتي إنك هتكوني جزء من العرض أمام العالم.. كان رد فعلك إيه؟
ج : كنت مبسوطة جدًا وفخورة ، حسّيت إن ده تكريم كبير ليا إن أشارك في افتتاح المتحف المصري الكبير، اللي العالم كله كان مستنيه ، كان شرف ومسؤولية في نفس الوقت.
الزي الفرعوني اللي ظهرتي بيه خطف الأنظار.. إزاي تم اختياره؟ وهل شاركتي في تصميمه؟
ج : الزي اتعرض عليّا بالشكل الأساسي، وأعجبني جدًا ، لكن اشتغلنا عليه وعدلنا شوية تفاصيل علشان يبقى مناسب أكتر ويطلع بالشكل اللي ظهر عليه في العرض.
أول لحظة لبستي فيها الزي.. حسّيتي بإيه؟
ج : حسّيت نفسي نفرتيتي فعلًا. حسّيت بعظمة، وبمسؤولية إني واقفة قدّام العالم بوجه مصر.. كنت فخورة جدًا.
شايفة إيه أهمية وجود رياضيين مصريين في أحداث ثقافية عالمية زي دي؟
ج : ده مهم جدًا ، لأن الرياضيين بيتعبوا وبيبذلوا مجهود كبير ومعسكرات وتمرين وتضحيات، لما الدولة تبرزهم في حدث عالمي بالشكل ده، ده دعم وتقدير حقيقي لقيمة الرياضة المصرية.
إحنا دايمًا بنشوفك في المياه، لكن هنا كنتِ وسط عرض حضاري عالمي.. التجربة نفسها كانت عاملة إزاي؟
ج : كانت مختلفة وممتعة. أنا دايمًا بظهر بشكل رياضي بسيط جدًا.. المرة دي كنت لابسة تاج نفرتيتي وفستان ملكة ، كل تفصيلة من التحضير كانت مبهجة ومختلفة ومليانة إحساس بالعراقة.
لو توصفِ العرض كله في كلمة واحدة.. تختاري إيه؟ وليه؟
ج : عظمة ، لأن كل اللي شاركوا شرفوا مصر.. وكل لحظة كانت معمولة بدقة واحترام لحضارتنا.. وكل اللي شاف العرض حسّ إن مصر قدمت رسالة جمال وقوة للعالم.
فريدة عثمان.. ملكة في الماء، وملكة على المسرح العالمي ، ومصر دائمًا قادرة على تقديم أبناءها في أبهى صورة أمام العالم.
